انتخابات الرئاسه : عمرو موسي قاااااااااااااادم

 

 سايقه عليكوا النبي ما تتعبوا اعصابكوا و لا تزعلوا نفسكوا و لا مرشح الاخوان هيكسب و لا عمر سليمان هيكسب و لا شفشق هيكسب و بسطاويسي و صباحي ربنا عالم بحالهم .

يفضل عمرو موسي … مش كده؟

هو ده قعر الحكايه

ماذا نستفيد من هذه المناوارت يا ثوار؟

أنا شخصيا شايفه ان المجلس حول انتخابات الرئاسه الي مولد و مسخره بكل معني الكلمه … تفتكروا بيعمل كده ليه؟ كسر عين طبعا! لان العالم اللي شهد لثوره مصر بالتحضر شايف برده المهزله ديه و فعلا فعلا المجلس العسكري بيثبت للعالم كله ان الشعب المصري غير مؤهل للديموقراطيه.

و علي فكره العسكر هزقوا تيارات الاسلام السياسي في الرجلين و بينوهم علي حقيقتهم قدام قطاعات كبيره من الشعب في نفس الوقت اللي وري فيه للتيارت الاخري (الغير اسلاميين) انهم مالوهمش شعبيه و كمان ان السلفيين لهم شعبيه او بمعني اصح قدره ع الحشد اكبر من التيارات المدنيه!

باختصار كده : لبس كل واحد في التاني و الاسلامين بقوا ملط و الغير اسلامين خايفين من التعصب الاسلامي و الكل خايف من دوله المخابرات اللي بيمثلها عمر سليمان…

و طبعا عمرو موسي هيظهر علي انه الحل الاقل نيله و هو مش بتاع اسلام سياسي و لا هو محسوب علي دوله المخابرات و رجل مدني و بتاع مؤتمرات و بيتكلم انجليزي و يقال انه عنده كاريزما و مش بتاع بسبس و الاهم من كل ده ان ماحدش يقدر يوجه له اي تهمه بالخيانه او الفساد … مش ملطوط يعني!

طاب احنا هنقعد نولول خوفا من عمر سليمان او خوفا من التعصب الديني ليه؟

العسكر اثبتوا انهم بيلعبوا لعب كبير : مش من الاولي ان احنا نبص هنعمل ايه بدل الهلع اللي احنا عايشين فيه!

أنا شايفه ان الشعب يريد اسقاط النظام … كل الطرق تؤدي للميدان

 

Advertisements
نُشِرت في Uncategorized | أضف تعليق

التحرك السلمى للثورة – أحمد سعيد

البوست ده مش أنا اللي كاتباه ده الاستاذ أحمد سعيد مدون مدونه عنبرالعقلاء … هو ممتنع عن الكتابه  في مدونته لأجل غير مسمي وكتب الكلام ده علي تويتر و انا قررت أني انشره هنا عشان القرايه تبقي اسهل و كمان عشان الكلام ما يغرقش تحت سيل التويتات … طبعا انا متفقه مع الكلام ده تماما ( خالتوكوا) 

ياجماعه , الكلام اللى جاى دة كان ردى على موضوع ( التحرك السلمى للثورة ) ياريت تقروة

يقال …اننا لما اتحركنا بالملايين فى الشوارع فرضنا سلميه الثورة , لاحنا كسرنا السلميه دى ولا النظام قدر يضربنا

 بقا النظام مضربناش ؟؟ هل تعلم ان ضحايا الثورة خلال ايامها الاولى اكبر من ضحايا جيش بشار وامنه فى سوريا خلال 3 شهور ؟؟

الداخليه ضربت وباقصى ما تمتلك من قوة , بس لما لقوا ان تصعيدهم بيحشد

الناس اكتر وبيزود عنف الثوار تجاه (ودة اللى هما بيخافوا منه)

فالنظام قرر يسحب الداخليه من الصورة علشان الثوار يبقوا سلميين ومستأنسين ودة هيعطى النظام الوقت الكافى علشان يحاول بطرق تاني

اما بالنسبه للجيش فمعروف ان الاوامر صدرت فعلا بضرب الثوار وتم سحبها بسرعه

بعد ما التقارير الامنيه اكدت ان قرار زى دة هيخلى اغلبيه ضباط الحيش وجنودة ينضموا بشكل رسمى للثوارواكيد طبعا هيستخدموا سلاحهم ضد النظام ( ودة برضه ما يخشاة النظام )  من هنا النظام وجد الحل فى تظاهر المجلس بحمايه الثورة وتبنيها

علشان الثوار السلميين الحلوين يسلموة السلطه عن طيب خاطر ويفرغ الحشد الثورى اللى فى الشارع ويبدأ يستفرد بالثوار

ويقسمهم لفئات ويضربهم ببعضهم بشكل تدريجى بالتوازى مع عمليات غسيل مخ مكثفه لضباط وجنود الجيش( اللى الوعى السياسى لاغلبهم متواضع )

علشان يستعديهم على الثورة والثوارعلشان لما تيجى ساعه المواجهه التانيه

(اللى النظام متاكد انها جايه بس بيحاول ياجلها لغايه لما يستعد له )

ساعتها المجلس هيكون ضامن ولاء ضباطه وجنودة ليه

هل تعتقد ان نظام بقذارة وتعفن نظام مبارك هيعجز عن استخدام سلاحه امام الحشود السلميه الا اذا كان متأكد انه هيتهزم؟؟

-نظام مبارك قبل الانحناء ( للسلميه ) لما شعر ان اصرارة وعنادة هيخليها ( مش سلميه ) وساعتها هو عارف كويس انه هيتسحق

ودة لانه كان فى ايدة ساعتها اوراق كتير لسه ملعبش بيها , زى المجلس والنخب الفاسدة و الاعلام

 الاعلام كان مستغل فعلا بس مش بكامل طاقته

دلوقتى اغلب الكروت دى اتحرقت , ولو النظام اتحط فى مواجهه فعليه مش هيقدر ينحنى لان ضهرة بقا فى الحيط وكروته كلها محروقه

-انحناؤة وقتها يعنى سقوطه فعليا , واكيد طبعا هو مش هيقبل بدة

-فن المساومه والضغط منطقيا انى اجبرك على شىء انت مش عايز تعمله مقابل انى ما احرمكش من شىء اخر اكثر قيمه منه بالنسبه ليه

او انى ما اتخذش معاك اجراء عواقبه هتكون اسوأ من رفضك تنفيذ اللى انا اجبرك عليه … من هنا انت بتقبل وبتنفذ

انما لما احاول اجبرك على انك تتخذ اجراء من شأنه انه هيقضى عليك نهائيا ,

مقابل انى لا اقدم على اجرائات من شانها تعريضك لخسائر جزئيه

او ادخل معاك فى مواجهه مصيريه , فأكيد انت هترفض لان فى كلا الحالات انت مقضى عليك , فالمنطقى انك مش هتقضى على نفسك بنفسك

او مش هتخطو خطوات هتكون نتيجتها القضاء عليك مستقبلا , وساعتها هتحاول تماطل فى المساومه لغايه لما تستعد كويس للمواجهه

اعتقد ان الكلام اللى قلته دة منطقى جدا ولما تستعد هتواجه بعنف وضراوة , اما تغلب او تتغلب

ومن هنا اقول تانى ان النظام انحنى للثوار فى فبراير لان كان عندة خطط بديله وكروت لسه ملعبش بيها, وكان عايز وقت علشان يعيد ترتيب اوراقه

مش علشان ( الخاله سلميه ) اصابته بالشلل .. النظام انحنى فى فبراير .. انحنى ولم يسقط

واعتقد ان السيناريو اللى بيحصل من فبراير لدلوقت بيؤكد صحه الكلام اللى قلته دة ..

ومن هنا اقول ان المواجهه الجايه هتكون دمويه وهيسقط فيها ناس كتير من

 الطرفين , لانها باختصار معركه مصيريه ,لأن كلا

 الطرفين ضهرة فى الحيطه

فيه ناس ممكن تكون فرحانه بانبهار الغرب ( بسلميتنا ) خلال التمنتاشر يوم بتوع الاعتصام

– بس اعتقد اننا لما نتخير بين ان الغرب يفرح بينا بينما احنا بناخد بالجزم ,فى مقابل ان الغرب يتصدم من لاسلميتنا بينما احنا بننعم بحريتنا

-اعتقد ان الخيار التانى هيكون هو الارجح

وعلى اى حال من الاحوال مش احمد سعيد ولا غيرة هما اللى هيوجهوا الشارع انه يبقا سلمى ولا دموى … الشارع قرارة من دماغه

وللعلم كلمه ( تحرك سلمى ) مش معناها انى لما انضرب على وشى اسلطح قفايا
..لأ,معناها انى لا ابدأ بالعدوان ,انما لو اتعرضت لعدوان ارد وبعنف

-ودى فلسفه الغرض منها انى احيد اكبر قدر من عناصر النظام ومفرضش انها تواجهنى واحطها فى خيار انها متواجهنيش مقابل انها تسلم من عنفى

-ودة اجراء بيحيد نسبه معقوله من عناصر النظام وبيشل جزء كبير من ذراعة

الامنيه

 ودة بيساعدنى ايجابيا فى مواجهتى مع باقى عناصر النظام

يعنى السلميه مجرد وسيله لخدمه ( اللاسلميه ) وليست هدف فى حد ذاتها

مع العلم ان ( الثورة ) فى حد ذاتها هى تحرك شعبى غير سلمى ضد نظام قمعى ,ولا تاتى الا بعد انسداد كل القنوات السلميه والاصلاحيه

دة معنى تحرك سلمى , مش زى ما ناس كتير فاهماة بالغلط …

وبعدين عندى سؤال , هل منطقى ان حد يكون بينادى بسقوط دوله العسكر بينما هو رافع

صورة جمال عبد الناصر وهو المؤسس الاول للدوله دى ؟؟

الا تسقط ايجابياته فى مقابل كم ضخم من الظلم والطغيان والقمع ؟؟

اعتقد ان شخص مؤمن بمثاليه الحياة وسيادة القانون ورفض العنف والسلميه وتجنب اللون الاحمر , شخص بالشكل دة مش هيقول دى نقرة ودى نقرة

ولا هيقول كل شخص له ايجابياته وسلبياته , وعبد الناصر بشر برضه ومافيش مانع انى ارفع صورته

بل هيرفض شخصيه زى عبد الناصر بالكليه .. مش كدة برضه ولا ايه

وبرضه هرجع اقول اول كلمه قلتها .. الايام بيننا… ولاحظوا انى قلت الكلمه دى ‎:

‏ كتير قوى خلال الكام شهر اللى فاتوا :

انزل يابنى بالسلام الوطنى الجديد بتاع المجلس العسكرى

لما اقول السلام الوطنى للمجلس العسكرى يبقا كله يفتح اللينك ويقف انتباة ويؤدى التحيه بطلوا كسل

 أحمد سعيد

نُشِرت في Uncategorized | أضف تعليق

الجيش حاجه و المجلس حاجه!

الصراحه أنا زهقت من الجمله اللي بقت علي كل لسان : ان الجيش حاجه و المجلس حاجه! طاب ما احنا عارفين! بس و بعدين يعني؟ و هل ده معناه ان الجيش تابوه و مش لازم حد يقرب منه و لا يتكلم عنه؟ وهل الهدف من الليله ديه ان احنا بعد ما شوفنا ان الفساد ضارب في البلد من ساسها لراسها ان الجيش معصوم من الفساد و ان كل مؤساسات الدوله فاسده الا الجيش! و هل ده كلام يعقل؟

ده هو الجيش أس الفساد و اس البلاوي السوداء اللي احنا عايشين فيها من يوم ما الظباط الاحرار لبسونا العمه! دول رجاله الجيش علي راس كل مؤسسه و في كل مكان في لواء فلان و لواء علان طالع ع المعاش بس ماسك منصب مهم جدا في وزاره الثقافه (مثلا يعني) طاب ايه دخل لواء ع المعاش بوزاره الثقافه؟ ايه مؤهلاته يعني عشان يشتغل في الثقافه؟ و برده ايه دخل بتوع الجيش في الأثار و في المحليات و في الجمعيات التعاونيه و في الانديه الشبابيه؟ ايه ده كله؟ هم كتير قوي كده ليه؟ و مافيش حد في البلد ديه مؤهل للمناصب ديه؟ هم هياخدوا قوتهم و قوت غيرهم…(في بلد الشباب بيتجوز علي نفسه لأنه مش لاقي شغل)  و اللي زاد و غطي بقي الخبراء الاستراتيجيين اللي بيطلعوا علينا في الفضائيات يعملوننا وصلات ردح و يدونا دروس في الديمقراطيه و في أداب الحديث و في مين يتقري و مين ما يتقريش و … مين يتسمع و مين مايتسمعش ! أنا عاوزه افهم هم الخبراء الاستراتيجيين دول بيعملوا ايه بالظبط؟ ايه شغلتهم يعني و بيقبضوا كم ؟ و ليه دايما بيكونوا ع المعاش؟ هم مش طالعين ع المعاش و عندهم معاشات جيش بسم الله ماشاء الله ؟ عايزين ايه تاني؟   أه صحيح أنا نسيت أصل الجيش خط أحمر! و ان هم دول الابطال اللي بيدافعوا عن الوطن ! (هموت و أعرف امتي دافعوا عن الوطن و لو حتي دافعوا مش ده شغلهم؟ )  و ان دول هم بعينهم افراد اقوي خامس جيش في العالم (ده يسري فوده اللي بيقول كده ماليش دعوه يا أخويا!) يعني الواحد يعمل ايه بالظبط؟ ايه المطلوب مننا؟ ان احنا بقالنا 60 سنه مضروبين بالجزمه القديمه من المؤسسه العسكريه بجلاله قدرها و لسه بنقول كماااااااااااااااااان! الجيش خط أحمر! مش هي ديه المؤسسه اللي خلت شعب مصر العظييييييييييييم يطلع يهتف في 1954 و يقول تسقط الديقراطيه؟صح؟ ابقوا اقروا التاريخ و بعدين تعالوا نتكلم. مش هي ديه المؤسسه اللي حطت محمد نجيب تحت الاقامه الجبريه عشان اتهف في عقله وقال للظباط الاحرار ان لازم يتعمل دستور و ان السلطه لازم تتسلم للمدنين! أنا سمعت الكلام ده فين قبل كده؟!!!!!!!!! مش هم برده اللي كدبوا ع الناس في 1967 و علي فكره كدبوا برده في 1973 في حرب أكتوبر المجيده! و كمان ذلوا سعدالدين الشاذلي عشان وقف قدام محاولات اغتيال تاريخ البلد ديه… و علي فكره السادات كدب و زور تاريخنا و بعد كده راح حط ايده في ايد الصهاينه وداس علي كرامه شعب مصر العظيييييييييييييم… و برده ماحدش من المؤسسه العسكريه حرك صابع واحد! و كمان السادات اتقتل زي الخروف علي مرئ و مسمع المؤسسه العسكريه و ماحدش فيهم اتحرك و انما مشوا وار الجديد اللي ذل أبونا لمده 30 سنه! و برده مافيش واحد يوحد ربه من المؤسسه العسكريه طلع يقول لاء للفساد. و لا ايه؟ بالعكس العسكر مكوشين علي اكتر من 30% من الاقتصاد المصري و شغاليين في السمسره بدل مايشوفوا شغلهم في حمايه الوطن بصحيح. و لسه في ناس كل ما تفتح بقها تقول الجيش حاجه و المجلس حاجه … طاب و الله كويس قوي!
و بالمناسبه الجيش ما كانش طايق المعفن اللي اسمه جمال مبارك مش حبا في الوطن و خوفا علي مصلحته! أبتا أبتا أبتا! و انما لأن جمال زفت مش من المؤسسه العسكريه و ان العسكر كان طالع من عينهم ان البلد هتخرج من تحت عبهم و تدخل تحت عب مبارك و عز و الاديشهم! ههههههه يعني الثوره جات للعسكر ع الطبطاب! العيال طلعت المظاهرات و اتضربت بالنار و اللي مات مات و اللي اتعمي اتعمي …و الجيش طلع بحلاوته و دباباته يكوش ع الليله! .

  الخلاصه ان الجيش المصري يروج الاكاذيب و الألاعيب من يوم ما محمد نجيب طلع أوت… و من يومها البروباجندا شغاله علي ودنه … مش اللي قبلنا قالوا الدوي ع الودان أمر من السحر؟ أهي البروباجاندا ديه هي الدوي ع الودان…( الاناشيد الوطنيه جزء هام جدا من البرباجاندا- احذروها!) الجيش فااااااااااااااسد و لما بقول الجيش يعني الجيش كله علي بعضه و بلاش لعب بالمفردات! المؤسسه العسكريه فاسده و كدابه و زورت تاريخنا و حرمت مصر من دخول التاريخ بعد ما خرجوا الاستعمار الانجليزي الجيش المصري استعمر مصر و اعتبرها عذبه أبوه و كل رئيس حكم مصر كان معتبرها عزبه اللي خلفوه هو و الشله بتاعته و القلل اللي قاعدين ع الكراسي النهارده بيتعاملوا معانا كده بيعتبروا مصر عزبه أبوهم … طاب يا مجلس احنا فاض بينا و مصر هتنظف من اشكالكوا العفنه لأن بالعربي كده اللي خارب البلد ديه انتواااااااااااااااااااااااااا و ده مش من 6 أشهر ده انتوا خاربينها من زماااااااااااااااااااااااااااا و بعد ثوره يناير اللي هي ثوره بجد لأنها ثوره شعب انتوا لاقيتوا السبوبه هتفلت من ايدكوا فطبعا مش هتسيبوها كده تروح منكوا لكن معلش بقي!

قبل ما أخلص عندي سؤال صغنطوط قوي للمتحفلطين: حد يعرف ميزانيه الجيش كم؟ و بتتصرف في ايه؟- أه صحيح ده أنا نسيت تاني ده الجيش خط أحمر! و الكلام في الميزانيه يخرج عن أداب الحديث ! طبعا طبعا ده حتي تبقي قله أدب ان الواحد مننا يتكلم في مواضيع حساسه كده! ده العين ما تعلاش عن الحاجب و الرعاع مش من حقهم انهم يسألوا عن سبوبه أسيادهم و يتناقشوا فيها! أي نعم! الجيش خط أحمر؟! – طاب حمرا بقي…

بصوا انا بقول أهوه  احنا هنكسب يعني هنكسب و انتوا هتمشوا يعني هتمشوا و مصر هتبقي دوله ديمقراطيه و هنطلع البلي الازرق علي جته الخليج العفن و اسرائيل القذره…. يا مجلس القلل لكوا عندي كلمه واحده فقط لا غير : انتوا عواجيز و احنا شباب فقانون الطبيعه بيقول انكوا ماشيين و احنا جايين … طز في ابو المجلس الاعلي للاجرام واحد واحد ! و ليسقط مجلس القلل … قله قله!

!و الله الموفق طبعاااااااااااااااااااااااا مافيهاش كلام

نُشِرت في Uncategorized | الوسوم: , | تعليق واحد

ثوره الغضب الثانيه : البيانات

البيان رقم 4
تاني : سلميه سلميه سلميه و اللي بيكفرونا لازم يخافوا من ربنا و اللي بيخونونا عيب احنا هدفنا مصلحه بلدنا

البيان رقم 3
سلميه سلميه سلميه

البيان رقم 2

البيان رقم 1

اتحاد صفحات ثوره الغضب التانيه

نُشِرت في Uncategorized | أضف تعليق

ثوره الغضب التانيه

الرفاق يتسالون حائرون ليه النزول يوم 27 مايو؟ ما كل حاجه ماشيه تمام و المجلس انقذ الثوره و المجلس هيسيب الحكم و يسلمها لحكومه مدنيه منتخبه و محاكمات مبارك و الفاسدين ماشيه أخر تمام و كله زي الفل !
ريم ماجد كانت بتتسأل مين اللي بينادوا لثوره الغضب التانيه ؟ عاوزه تكلم حد منهم
ماشي … بالرغم من اني مش من الادمنز بتوع الصفحه لكني أعرف كذا واحد فيهم و اتكلمت معاهم و اتناقشنا كتير و قليل …
البوست ده للسيده ريم ماجد لو حد عرف يوصل لها كلامي يبقي مشكور و له الاجر و الثواب
مين الشباب اللي بينادوا لجمعه الغضب التانيه و عملوا صفحه ع الفيس بوك؟
طبعا هم شباب عاديين جدا و لا اتدربوا في أمريكا و لا في الهند و لو اساسا كانوا راحوا أمريكا كانوا هيرجعوا يقرفوا نفسهم ليه في المهاتيه في بلد الفساد ضاربها من ساسها لراسها ؟

هم شباب عادين بس حبهم للبلد غير عادي و خوفهم علي اختطاف و ابتذال الثوره فوق العادي … شباب شافوا حلمهم قدام عينهم و أملهم في الحياه و المستقبل رجع تاني و فجأه شافوا ان الحلم بداء يتبدد و بقي طيف و هيروح من قدامهم في شربه مايه
شباب بعد ما شافوا الحلم علي وشك انه يتحقق مش هيسيبوه كده كي يذهب مع المجلس العسكري …. لا أبدا مستحيل!
الشباب دول فرحوا بالمجلس العسكري … بس فرحه متأنيه … فرحه عاقله و لو ان الكل بيعتبرهم شباب طايش الا انه شباب متأني و فاهم و بيستخدم نعمه العقل اللي ربنا عرفوه بيها … طبعا اعترفوا بالمجلس و بشرعيته بس مانسيوش موقف الجيش يوم موقعه الجمل … عارفين ليه مانسيوش؟؟؟؟ لأنهم كانوا هناك … لأنهم شافوا بعينهم ان الجيش كان بيوسع السكه عشان البلطجيه تدخل الميدان … و شافوا برده ظابط محترم زي النقيب ماجد بولس  ازاي دافع عن المتظاهرين زي الاسد …  و شافوا ان هو لو عمل كده ده لأنه رجل من ظهر رجل و ان التعليمات كانت بعدم التدخل و انه اتدخل و أجره علي الله .
الشباب دول شافوا اللي حصل عند مجلس الوزراء يوم 26 فبراير و كمان كتير منهم قبل اعتذار المجلس تاني يوم و لأنهم مصريين و سمت المصري التسامح … سامحوا و قالوا ماشي ديه غلطه مش هتتكرر
لكنهم كانوا بردوا موجودين يوم 9 مارس و كتير منهم اتشدوا ع المتحف و اللي كان حظه حلو و ماراحش محاكم عسكريه اتسحل و اتضرب و اتهزق في المتحف و شاف اخواته الولاد و البنات و هم بيتهزقوا و ظباط الشرطه العسكريه بيقولوهم ارفع راسك فوق انت مصري … و لما يرفعوا راسهم الظباط كانت بتلطشهم بالقلم علي وجشهم المصري اللي هم معتزين بيه !
الشباب دول كانوا موجودين يوم 9 أبريل و شافوا اللي حصل و كتير منهم حبوا يحموا ظباط الجيش اللي كانوا هناك … عارفين حبوا يحموهم ليه؟ لسبب بسيط قوي :  لأن كان لسه في عقلهم و فوجدانهم صوره اسد الميدان ماجد بولس … و كانوا شايفيين ان زي ما ماجد بولس حمي الثوار هم كمان لازم يحموا الظباط اللي حطوا عمرهم علي ايدهم و نزلوا يقولوا لاء للظلم و الفساد … و لا عزاء لكل المنظرين اللي طلعوا يقولوا كلام مالوش راس و لا رجليين
شباب 9 ابريل اتعاطفوا مع الظباط لانهم منهم و عليهم و ده أكبر دليل ان الشباب دول بيحبوا الجيش بل و بيقدسوه! لكن الجيش اللي هم بيحبوه هو الجيش اللي من نوعيه ماجد بولس و غيره من المعدن ده … الظباط اللي بيدافعوا عن شعبهم بصدر مفتوح و لا بيهمهم أي خوف و لا أي قائد فاسد …
نيجي بقي للفساد :
الشباب اللي بينادي بجمعه الغضب فاض بيه الكيل بسبب حاجات كتير منها الاتي :
– تماطل المجلس العسكري في كل حاجه و أي حاجه علي سبيل المثال تقديم مباك للمحاكمه اللي حصل بعد شهرين من قيام الثوره … مش لازم ننسي النقطه ديه لانه ده ادي فرصه لكل واحد انه يرتب أوراقه
– بعد المحاكمات  ما بدأت … كلنا شايفين انها محاكمات هزليه و لا لها أي علاقه باي عداله بل بالعكس … المحاكمات ديه هي عباره عن استخفاف بينا كلنا كمجتمع قام بثوره شعبيه

  -لغايه هذه اللحظه مافيش أي واحد من اللي قتلوا الثوار حصل له أي حاجه و كذا واحد منهم اترقي ! ده كلام يا ناس! و بعدين بتسالوا هم الشباب غضبانين ليه!
– المدنيين بيتحاكموا امام محاكم عسكريه شغاله فوريره و من غير أدله و من غير دفاع و من غير حتي أهل المتهمين … ايه ده؟ هو احنا عملنا ثوره عشان حالنا و حقوقنا تبقي ابشع من قبل الثوره في نفس الوقت اللي الفاسدسن بيتعاملوا بكل حنيه ! و بتسألوا ليه الشباب غضبانين!

                  – المحليات … هاتينا يا ناس ياهوه حلوا المحليات و عاوزين محافظين بالانتخاب! و لا حياه لمن تنادي!
– فين الامن؟ و ازاي لغايه دلوقت ماحدش عارف يجاوب ع السؤال ده؟ طاب حد يقدر يقولنا هل هم بيقبضوا مرتباتهم؟ طاب ازاي الامن اللي كان مختفي ظهر بقدره قادر ليله السفاره الاسرائيليه؟ طاب ازاي المجلس العسكري اللي بيتعامل مع المدنيين علي انهم اعداء الوطن و لا يتردد لحظه انه يسحب أي مدني للمحاكم العسكريه مش عارف يلم الظباط دول اللي مش عاوزين يشوفوا شغلهم؟ ليه يعني مش بيتقدموا لمحاكم عسكريه هم كمان؟ و لا لسه فيه خيار و فقوس؟ أه طبعا اصل احنا الشعب دايما بنتعامل علي ان احنا رعاع و كل الاجهزه الامنيه اسيادنا! مش كده برده؟

                            – ازاي و لا واحد من اللي عملوا فتنه في أطفيح و المقطم ما أتقدمش للمحاكمه ؟ بأماره ايه الموضوع يمشي بصلح مصاطب ؟ احنا مش مجتمع و لا ايه بالظبط … حتي لو الناس سامحت في حاجه اسمها حق مدني و أمن قومي … ازاي يتساهلوا في ده؟ ازاي يتهاونوا في أمن الوطن و يرجعوا يقولولنا ان المعتصمين هم اللي بيهددوا امن الوطن! ليه بيستخفوا بينا؟ ليه؟

                               – أسر الشهداء و مصابين الثوره … ليه بيتعاملوا علي انهم شحاتين و الكل متضايق منهم و ماحدش عاد طايقهم وكمان الاسر بتتعرض لضغوط و ممارسات مشينه و مهينه من الظباط اللي دايرين يعيثوا في البلد فساد و بيهددوا و بيتوعدوا للأسر ؟؟؟؟؟ ليه؟ ازاي ؟ باماره ايه ده كله يحصل بعد ثوره 25 يناير … الثوره ديه قامت يوم عيد الشرطه … حد فاكرليه؟ لأن  الشعب فاض بيه و زهق من منهج الشرطه ( و مش تجاوزات) لانها منهج و طريقه شغل و الكل عارف ده و بلاش بقي نستهبل أو نضحك علي نفسنا… الشرطه صعرانه يا ناس و الدليل أهوه ماحدش عارف أو قادر أو عاوز يلمها! هل أنا غلطانه؟

                    أنا شخصيا شايفه ان ديه مؤامره ضد الثوره و الثوار … مؤامره الهدف منها ان الانفلات الامني يستمر عشان الثوره تتعاقب و عشان الناس تقول ان الثوره هي السبب في الفوضي و الفتنه الطائفيه و الانهيار الاقتصادي و عشان يقولوا : و لا يوم من أيام مبارك . لان هي ديه المساومه بتاعت مبارك لما قالنا : يا أنا يا الفوضي … ازاي يعني المجلس العسكري يسمح بكل ده؟ ! هي حاجه من الاتنين : يا شايف يا مش شايف اللي بيحصل . لو شايف و ساكت يبقي متواطء لو مش شايف يبقي غير قادر علي اداره البلاد !

أحنا غضبانين … أيوه غضبانين لان أملنا في الثوره كبير … و عاوزين تغيير حقيقي مش كده و كده

أرجوا الجميع انه يفهم ان في ناس زي بتوع ائتلاف الثوره مثلا اللي قاعدين كل شويه يرقعوا في مطالب الثوره و يدللوا عليها …ماشي ديه طريقتهم (وعلي فكره هذا الائتلاف لا يمثلنا يمكن بيمثل ناس تانين لكن احنا لاء و عاوزه أقول لنواره احنا مش 15 زي ماقالت امبارح في برنامج يسري فوده احنا كتيرو عيب انها تسفهنا و تسخر مننا هي مش من حقها انها تحجر علي أي حد ) !ولو نواره و الائتلاف من سماهم الهواده و الثقه العمياء في المجلس العسكري ده مايمنعش ان في ناس تانيين شايفين الامور بطريقه مختلفه  لكن ده مش معناه اننا عملاء و لا ان احنا شباب طايش مش فاهم مصلحه البلد و ان احنا عاوزين الفوضي و لا ان احنا هنولع في البلد و لا ان احنا ضد الاستقرار… لا أبدا خالص … احنا شايفين ان نيل المطالب ليس بالتمني و لكن تأخد الدنيا غلابا … احنا ناس مانحبش الحال المايل مايعجبناش التلييف و الطبطبه و كمان دمنا حامي شويتين  … و مقتنعيين ان مافيش حد فوق النقد و لا عاوزين نسمع حاجه اسمها خطوط حمرا … لا للخطوط الحمرا …
أساسا احنا مش شايفيين انه من الطبيعي ان اللي قاموا بالثوره (يعني كل اللي نزلوا من جميع طوائف الشعب)  و دفعوا دمهم مقدم … مش من الطبيعي انهم يبقوا قاعدين في مقعد اللي بيطلب و يتوسل و يتسول  للمجلس أو للحكومه و يقولولهم و النبي عشان خاطرنا حققوا مطالبنا لو سمحتوا و نبقي مزلولين و المجلس و الحكومه يقولولنا ماشي ماشي بس روحوا انتوا ياحلوين و احنا هنشوف !!!!!!!!!!!!!! ايه ده؟ مش ده برده اللي مبارك كان قالهولنا : الرساله وصلت!

معلش يا كبارنا …مافيش حاجه اسمها الرساله وصلت …ده كان زمان!

دلوقت في ثوره شعبيه و الثوره لا تتذلل لأحد و لا تطالب بمطالبها … الثوره لها أهداف هتتحقق و التغيير هيحصل لا محال … و لو المجلس العسكري مش فاهم ده يبقي غلطان … لأن بكل بساطه احنا اللي هنكسب … لأن احنا الشعب و ديه ثوره شعب

  اتمني ان كلامي وضح الرؤيه و عبر عن وجه نظر شباب ثوره الغضب التانيه ولو حد معارض وجهه نظري أو عاوز يضيف أي حاجه ارجواكوا اتفضلوا و ضيفوا و اعترضوا زي ماأنتوا عاوزين أنا هدفي ان وجهه النظر توضح مش الحجر عليها … هدفي اني اقطع الطريق علي ناس زي اللواء سويلم انه يتهمنا بأننا عملاء … لأن ده قبل مايبقي ظلم فهو عيب جدا جدا جدا الكلام اللي قالوه امبارح

 شكرا لكل شخص بيحاول انه يوصل رسالتي لريم ماجد …مع كل احترامي و تقديري  

نُشِرت في Uncategorized | الوسوم: | أضف تعليق

يوم انتقاد المجلس العسكري

قلت لكم مرارا
ان الطوابير التي تمر …
في استعراض عيد الفطر و الجلاء
(فتهتف النساء في النوافذ انبهارا )
لا تصنع انتصارا .
ان المدافع التي تصطف علي الحدود , في الصحاري
لا تطلق النيران …الا حين تستدير للوراء .
ان الرصاصه التي ندفع فيها … ثمن الكسره و الدواء :
لا تقتل الاعداء
لكنها تقتلنا … اذا رفعنا صوتنا جهارا
تقتلنا , تقتل الصغارا !
( أمل دنقل – تعليق علي ماحدث في مخيم الوحدات )

يا حلاوه يا ولاد انا سمعت ان النهارده 23 مايو يوم اباحه نقد المجلس العسكري هيييييييييييييييييييييه!
المدونه ديه مافيهاش بوست واحد يوحد ربه ما فيهوش نقد للمجلس … أنا بشحمي و لحمي و مدونتي …ننقد المجلس … بكل فخر
و بما ان النهارده المحظور مباح و هنفتخها ع البحري … يبقي استعننا ع الشقي بالله
بسم الله الرحمن الرحيم
نبتدي منين الحكاااااااااااااااايه؟

أفتكر ان الكلام في محاكمه المدنيين محكام عسكريه بقي عامل زي الطبيخ البايت من يوم 25 فبراير …يعني قولنا و عدنا وزدنا ان المجلس المبجل نازل هرس في خلق الله بحجه انهم بلطجيه … أو فلول …لدرجه ان الواحد بدأ يتعاطف مع البلطجيه و كمان ناقص نعمل صفحه فيس بوك و نسميها كلنا فلول … أما عن العصابه و شيخ المنصر و مرته و عياله الناس لسانها وجعها من اللوكلوك و المهاتيه يا ناس يا هو عاوزين نحاكمهم بما يرضي الله ..لكن.مافيش فايده برده ….و الملل بدأ يركبنا من ساسنا لراسنا و كرهنا نفسنا و كرهنا البلد و بقينا عاوزين نهج اذا ماكانتش الناس بقي تفوق لنفسها و ترجع تقف في الشارع عشان المجلس يفهم ان احنا واقفين ع الوحده و مش هنسيب حقنا ابتا ابتا ابتا …

يوم ماعمر سليمان طلع علينا بسحتنه العكره يقولنا ان المخلوع خلع …و ان المجلس العسكري مسك اداره البلاد …أنا قلبي اتقبض و مافرحتش علي طول …لأني قلت في عقلي بالي يابت لو العسكر مسكوا البلد سيبقي الحال كما هو و يمكن انقح شويتين! أي و الله! سألت نفسي طاب ازاي الشعب يقوم بثوره و بعدين اللي يحكم اللي كانوا حاميين حمي مبارك و عصابته؟ أزاااااااااااااي؟
يعني هم عاوزين يفهمونا انهم ماكانوش عارفين اللي بيحصل في البلد أو يا والده انهم ماكانوش شايفيين الفساد اللي كان طافح زي المجاري في العشوئيات؟ و النبي ايه؟ أو يمكن كانوا شايفيين و عاملين مش شايفيين يعني ؟ أو يمكن كانوا شايفيين و موافقين و باصميين بالعشره و مبسوطين 24 قيراط ؟ أختاروا انتوا السيناريو اللي يعجبكوا من السيناريوهات ديه و هتشوفوا ان ايا كان موقف او نيه قاده العسكر … كان موقف منيل بستين نيله. يعني خلاصه الكلام ازاي بقي دول بومقفهم المريب هيمسكوا بلد بعد ثوره شعبيه طالبت بالحريه و الكرامه و العداله ؟ أزاي؟ و لما هيمسكوها هيبقوا مشغولين في ايه؟ بعد 3 شهور الوقت اثبت لنا ان المجلس الاعلي للقوات المسلحه بيقضي وقته و روحه و دمه في محاول اجهاض الثوره … و بيبذل الغالي و النفيس من أجل هذه المهمه الغير وطنيه.

قائمه انجازاته في هذا المجال طويله قوي
من باب السرد وليس الحصر ممكن نقول الاتي :
– غياب الامن تماما و خصوصا في المواقف الحرجه زي مثلا مايسمي بالفتنه الطائفيه …بدأ من أحداث أطفيح و المقطم الي احداث امبابه و بلطجيه ماسبيرو اللي طلعوا من تحت الارض يفكرونا بالذي حدث في ليله موقعه الجمل الشهيره … فين الأمن؟ بح مافيش! طاب المجلس بيعمل ايه؟ ماحدش عارف! طاب مين اللي المتهم في هذه الاحداث ؟ و لا حد يعرف! حد فيكوا يعرف مين المتهم في أحداث أطفيح أو المقطم ؟ ؟؟؟؟؟؟ و لا حد يعرف.
– التخويف من الانهيار الاقتصادي! هم يقولوا الانهيار الاقتصادي قادم و وزير الماليه يقول لاء …ديه مصر هتكتفي ذاتيا من القمح السنه ديه؟ ماحدش عارف مين الصح و مين الكذاب …أو يمكن كلهم بهايم و لا عارفين هم بيتكلموا عن ايه و مايستاهلوش الكراسي اللي قاعدين عليها! أو بيستهبلونا و مستخفين بعقولنا !

– محاكمات العصابه ماشيه نونو نونو … و كل يوم أوشاعه و كل يوم حكايه و سوزان رجعت الفلاويس و مبارك هيعتذر و كل الليله ديه … و ما يتبعها من سياسيه جس النبض…كل شويه ياخدوا درجه حرارتنا و يحطولنا الترمومتر في حتت قله أدب عشان يوشوفوا هل احنا رجعنا زي ماكونا و لا لسه صاحين ؟ لما يلاقونا قاعدين مفنجلين يطلعوا يكدبوا الخبر ده! طاب مين اللي يجراء يطلع اشاعات من النوع ده؟ و ليه مش بيتعاقب أو ع الاقل ليه مش بيطلع تكذيب و يعتذر عن الاخبار الغير مظبوطه …و لا هو المجلس بس فالح يقبض ع المدونيين اللي بينقدوه بتهمه بث أوشاعات ع سيد الناس و ولي أمر العباد : .المجلس العسكري
– قالوا المصريين اللي في الخارج هيصوتوا و رجعوا قالوا لاء و بعدين رجعوا قالوا يمكن يصوتوا! أنا ماعودتش عارفه هيصوتوا و لا لاء … بس اللي أنا عارفاه انهم طلعوا خبر جس نبض برده و قالوا ان المصريين اللي في الخارج و الشرطه و الجيش هيسمح لهم بالتصويت! يعني ديه قصاد ديه! ورجعوا كذبوا برده !!!! حاوريني يا كيكه …الواحد دماغه هتنفجر …ماعدناش فاهمين حاجه ؟؟؟ و برده ماحدش من الصحفيين اللي نشروا الخبر كدب أو اعتذر ولا أي حاجه….

المجلس من يوم ما مسك الحكم او اداره البلاد … (سموه زي ما أنتوا عاوزين) و هو بينفذ بالحرف الواحد خطه المخلوع يعني بيذل كل جهده عشان يثير الفوضي و الفتنه و الانفلات الامني عشان الناس تقول جاي من ديه ثوره و لا يوم من أيام مبارك
انتوا طبعا هتقولوا اني مفتريه و ضلاليه ! لكن العينه من يوم ما المجلس مسك البلد ان أول حاجه عملها هي تفتيت الوحده و التماسك بين جميع فئات و أطراف المجتمع المصري اللي ظهرت و كلنا شوفناها في كل ميادين مصر طول ال 18 يوم اللي سبقوا وقوع المخلوع .

– تفتيت و تشتيت الرأي العام بالاستفتاء اللي ماكانش له لازمه اصلا

 – تفتيت الوحده بين المسلمين و المسيحين

– تشتيت الرأي العام بالاكاذيب و الاشاعات و جس النبض كل يوم و التاني لدرجه ان الناس مابقتش تصدق أي حاجه و لا حاجه و كل الغرض من ده ان الناس ما تسمعش الا المجلس و كلام المجلس

-انعدام الأمن و بعدين يرجع يقولنا السياحه اتضربت و الانهيار الاقتصادي ع الابواب! الله ! طاب ما تجبروا الامن انه يشوف شغله بدل ما أنتوا قاعدين تولولوا …و هتشوفوا ان السياحه هترجع و ان الاقتصاد هيبقي زي الفل!

خلاصه الكلام ايه؟ احنا لازم نرجع نقف في الشارع … عارفين يوم التنجيد؟ اليوم ده أهل البيت بيقفوا علي أيد المنجد لغايه لما يخلص و يتطمونا ان الشغل فله و ان العروسه هتدخل علي أحلي و أنظف تنجيد! هو كده بما ان احنا قررنا نسيب للمجلس مسؤليه تحقيق مطالب الثوره _و ديه طبعا غلطه كبيره جدا جدا الا ان دلوقت هو ده الواقع _ يعني هم ينفذوا مطالب الثوره و احنا نقف علي ايدهم! و لو اني شايفه ان الحل الامثل ان احنا نقولوهم لقد نفذ رصيدكم و انتوا و لا لكوا في التنجيد أصلا احنا هنتصرف بطريقتنا و اتكلوا انتوا علي اللي خلقوكوا و ارجعوا الثكنات احموا حمي الوطن من العدو الخارجي و احنا هنجيب مجلس رئاسي مدني يعافر فينا و نعافر فيه لغايه ما ننول المراد و مصر تبقي عروسه منوره الكوشه.

27 مايو ميعادنا في كل ميادين مصر و لو ماتقدروش تنزلوا اقفوا في البلكونه او في الشباك … عاوزين نشوف مصر عروسه منوره بولادها …عاوزين الكرامه و الحريه و العداله للجميع …مش عاوزين شويه كذابين و افاقين و فاسدين و خونه يمشوا بلدنا علي مزاجهم و ينهبوا ماضينا و حاضرنا و مستقبلنا… عاوزين بلد تحمي الكل بغض النظر عن لون او جنس أو ديانه
عاوزين دوله قانون يمشي علي رقبتنا كلنا زي السيف …

عاوزين نقدر نقول و بجد و في كل مكان بره و جوه مصر : أرفع رأسك فوق … انت مصري

كفاك يا مجلس يا عسكري استهزاء و استخفاف بينا … احنا المصريين معني في كل هذه الفوضي اللي انت متقاول عليها مع المخلوع …كفاك!

خالد دياب يكتب: المجلس الأعلي..هاتخربها وتعد علي تلها

نُشِرت في Uncategorized | الوسوم: | 2 تعليقان

عفي الله عن ما سلف

  سيقولون :
ها أنت تطلب ثأرا يطول .
فخد – الأن- ما تستطيع:
قليلا من الحق …
في هذه السنوات القليه.
انه ليس ثأرك و حدك ,
لكنه ثأر جيل فجيل .
(لا تصالح – أمل دنقل)

في حلقه يسري فوده بتاريخ 18 مايو الحوار كان عالي و تمام و محترم و كل الكلام اللي اتقال عن العفو عن سوزان او العفو عن المخلوع او عن زكريا عزمي أو غيرهم  خلاصته كانت ان ما فيش حد من حقه يعفي عن هؤلاء المعفنين و لا حتي انه يطرح فكره العفو من اصله ….و ان اللي لازم يتعمل هو محاكمات عادله عشان الشعب ياخد حقه تالت و متلت و ان الموضوع مش موضوع فلوس و انما الحكايه أكبر من كده بكتير باختصار كده : العصابه اياها نهبت ماضينا و مستقبلنا و لحمنا و أحلامنا …كل اللي احنا عاوزينه انهم يتحاكموا محاكمات عادله
لكن واضح ان البعض مش شايف الطلب ده بديهي و انه حتي مش محتاجه ان يسري فوده و ضيوفه العتاوله دول يقعدوا يهاتوا في الموضوع ده 3 ساعات بحالهم …يعني يا جدعان هي أمله ان مجتمع اتمسح بكرامته اللي خلفوه الارض( و هيتمسح بكرامه كل الاجيال اللي بعده الارض) انه يطالب بمحاكمات عادله؟؟؟؟؟؟؟؟؟؟؟؟

الله يخرب بيت كده يا أخي!!!!!!!!!!!! يا عالم يا هوه احنا مش عاوزين انتقام و لا عاوزين افتري و لا عاوزين حتي ان حد يمس شعره من شعر المعفنين دول …عاوزين بس بس بس حقنااااااااااااااا….و ده طبعا غير وادر في المعجم المصري ان الشعب يطالب بحقوقه …ده في حد ذاته البعض (مش عارفه مين بالظبط) يعتبره خروج عن أداب الحديث …اي و الله! أصل احنا لازم نحط في بقنا جزمه و نعقد نحسبن زي الوليه مكسوره الجناح ! كده يبقي تمام و احنا نبقي شعب محترم بالرغم من  انه جاهل و مش لاقي ياكل…طبعا البعض هيقول الكلام ده.

لاء بقي! أحنا طلعنا شعب سماوي و عاوز يحاكم مبارك و عائلته الغير محترمه و العصابه اياها …حد شريكنا بقي …دول كانوا كبرات بلدنا و احنا حرين فيهم بس واضح ان طلبنا بوقوف مبارك و المودام قدام القاضي طلع طلب خزعبلي من شعب بداء يخرف من كتر الفقر و الجهل و أكل الفول و الطعميه اللي ماحرقوش قلبنا و بس و لكن أدوا بينا الي عاه البلاهه المعروفه كأثار جانيه عند مدمن الفول و الطعميه …و ده طبعا معناه ان احنا ما بنفرقش بين الالف و المحكمه و لا بين أسيادنا و بلطجيه ماسبيرو …و الحمدلله المجلس العسكري موجود عشان يورينا الطريق السليم …يعني الكنبه  …عشان نقعد بكرامتنا نسمع كمنجات الاعلام اللي بتعزف علي نوته ان الرجل كبير يا عين امه و مراته وليه …و حرام و عيب …أهم هيرجعوا الفلوس … و ناقص يرجعولنا عمتوا عفاف شعيب تقولنا ده أب و لازم نبعت له بيتزا و ريش شرم الشيخ …

يا أخي جاتكوا البلاوي و الغم يا مجلس يا اسمك ايه انت؟؟؟؟؟؟؟؟؟؟ أه الأعلي للفساد…

ده انتوا فقعتوا مرارتنا و زهقتونا في عشيتنا …قرفنا بقي قرفننننننننننننننننننا
من يوم ما المخلوع اتخلع و أنا رافعه شعار : النظام يستهدف مراره الشعب.
و أفتكر ان الوقت اثبت لنا كلنا ان الخطه ديه ماشيه أخر ميت فل و عشره و اتحدي أي واحد منكوا لسه مرارته بخير …يا مجلس …مرارتنا اتفقعت و خلاص ماعودناش طاقين هدومنا …و اللي زاد بقي البلي طين ان بعد ما يسيبوا الاوشاعه عشان يجسوا النبض ….طلعوا بيان كميل قطوط … يكذبوا فيه أي نوايه عن العفو عن المخلوع
كفايه بقي استخفاف بعقولنا …أي نعم احنا مش لاقين ناكل …بس احنا مش بهايم و عارفين كويس قوي ان كل المسرحيه ديه من اخراج و تنفيذ المجلس و ان الاعلام لازم ينظف لكن المجلس مش هاين عليه شويه الرعاع اللي قاعدين في الاعلام العميل الخاين
يا مجلسنا المجبل : سلملي ع الثوره المضاده!

نُشِرت في Uncategorized | الوسوم: , | أضف تعليق