شعار الثوره

 أيها الواقفون علي حافه المذبحه

أشهروا الاسلحه !

سقط الموت ؛ و انفرط القلب كالمسبحه

و الدم انساب فوق الوشاح !

المنازل أضرحه ،

و الزنازن أضرحه

فارفعوا الأسلحه

و اتبعوني !

أنا ندم الغد و البارحه

رايتي : عظمتان …و جمجمه

و شعاري : الصباح !( أمل دنقل – سفر الخروج)

شعار ثوره 25 يناير : حريه و عداله . قالوا علينا في الأول عملاء و أجندات و كانت ديه حجتهم عشان يبرروا دبحنا علني علي مائده الديتكاتوريه و لكن شوفوا حكمه ربكوا … بدل ما الدبح يكتمنا و يخوفنا شهدئنا كانوا قربان لصاحبه العصمه و المقام الرفيع : الحريه. و بعد ما أتقال علينا العبرالوضع انقلب و بقينا الشباب الطاهر اللي مالوش اجندات و لا أي انتماء سياسي و لا أي وعي سياسي و كأن الاهتمام بالسياسيه تهمه؟؟؟ عجبي عليكي يا أدي البلد يا أم العجايب!  نجحت الثوره…طاب بأماره ايه نجحت الثوره؟

هبتدي بالعداله

قالوا لازمن و لابد العدل ياخد مجراه عشان نبقي دوله قانون و الكلام ده …علي عهده الكلمتين الحلوين دول …قعدوا يماطلوا و يتحججوا عشان مايقبضوش علي الفاسدين و اللي اتقبض عليهم رايحيين جايين من المحكمه لمنتج طره و و كل مره تتأجل الجلسه…هحط فبقي جزمه و أسكت و مش هقول حاجه و همشي ورا العداله لحد باب المحكمه و أرجع ايد ورا و ايد قدام …ماشي يا عم!

العداله الاجمتاعيه و مطالب الناس بما فيه تنفيذ الحكم بالحد الادني للاجور …الحكم ده محكوم بيه من زمان بس عاوزين ننفذه …لا ما ينفعش عشان ديه مطالب فئويه ! كلمه مطالب فئويه بقت تهمه في حد ذاتها و كمان يقال ان اللي بيسخن الناس ع المطالب ديه فلول النظام القديم و بتوع الحزب الوثني و كل ده!
طاب بلاها المطالب الفئويه ….هنحط فبقنا باتا بحاله عشان نسيب الحكومه بمجلسيها تشوف شغلها (اللي أنا مش عارفه ايه لو مش تحقيق مطالب الثوره ….بس ماشي …هنقول اني مش فاهمه الشغل الكبير بتاع الحكومه …هسكت علي ديه كمان… أنا عامله أوكازيون سكوت اهوه …

الحريه : مالها ديه بقي؟ الحريه سهله ديه مش محتاجه تنفيذ بتوع فئويه و من المتعارف عليه ان الحد الادني للحريه هو حريه التعبير عن الرأي! و لا ايه؟ لو أنا غلطانه قولوا انتي غلطانه…

ليه بقي عاوزين يمنعونا من التظاهر و المطالبه بتنفيذ مطالب الثوره اللي مافيش مطلب واحد منها اتنفذ الا بسبب المظاهرات و من المعروف ان مبارك اتقطم وسطه يوم ما العمال و مختلف الفئات من أطباء و أساتذه جامعه و محاميين و صحفيين و غيرهم قرروا الدخول في اعتصام مفتوح لغايه ما الرزل يرحل ….وقد كان : بعدها بومين اتخلع ! و السيد الفاضل عصام شرف كان علي رأس مظاهره أساتذه الجامعه و كان يوم من أهم أيام تارخ مصر الحديث …جسمي لسه بيقشعر لما بفتكر الاعتصام قدام مجلس الوزراء

و شفيق اتخلع بسبب المظاهرات

و كمان مبارك و الشله ايها اتقدموا للمحاكمه بسبب المظاهرات…مش كده و لا ايه. أوعوا حد يقولي ان مبارك و عياله الرزلين اتقدموا للمحاكمه عشان المجلس بيخاف ربنا…ابتا ابتا ابتا!

الجمعه اللي فاتت (9 أبريل) لما ظهر الظباط في المظاهره و اعتصموا و حصل اللي حصل , ديه كانت أول مره ناس تهتف يسقط المشير و المجلس العسكري…حصل و لا لاء؟ و بالرغم من اني مش مع اعتصام الظباط و لا ضده و عاوزه ان الثوره ديه تفضل ثوره شعبيه مدنيه و مش عسكريه الا ان ظهور الظباط دول وسط المظاهره كان له اثر كبير علي الاخوه بتوع المجلس و أنا شايفه ان الدور ده و كأنه باب اتقفل علي صباع المجلس ! أي أي أي أي! ابوكوا المجلس قعد يتننط من الوجع و أنا معاكوا ان قفل باب علي صباع مابيموتش لكن بيوجع قوي قوي و ممكن يطير ضفر كمان! المهم لما المشير شاف ان الظباط ممكن يتقلبوه عليه و ان الاصوات بدأت تعلي في الميدان بالمطالبه بمجلس مدني أي نعم عملوا مابدالهم علي أساس ان الميدان لازم يفضي بسبب الظباط المعتصمين الا ان المجلس بعدها بيوم فقط لا غير قرر يقدم ال مبارك للمحاكمه و انتوا عارفين باقي الحدوته .

أنا مش بقول ان ده بفضل الظباط وبس طبعا المدنيين لهم فضل كبير و دور أكبر من الظباط لكن ظهور الظباط خوف المجلس و خلي اللي مايشتري يتفرج علي شعبيه المجلس و هيبته داخل المؤسسه العسكريه و خارجها . و ناس بدأت تهتف الجيش و الشعب ايد واحده و المجلس و مبارك ايد واحده! هههههههههه! و بان اللي بان و المجلس خاف علي منظره و علي انه يبان مفصول عن الجيش و ان الظباط ممكن يتدوروا ضد قياداتهم ! و عشان المشير يدور انتباهنا عن الليله ديه قالك بقي مابدهاش قدموهم للتحقييقات حقي برقبتي . و علي أي حال مهما حصل عمر ما مبارك هيتعمله محاكمه لأنه هيموت قريب قوي قوي بسبب سرطان البنكرياس اللي عنده و في المرحله النهائيه من المرض ده المريض بيدخل في غيبوبه…يعني لو اتحقق معاه النهارده ممكن بعد اسبوع التحقيقات تقف بسبب الغيبوبه . حيفضل مين؟ العيال الرمم ولاد مبارك دول بقي المشير بيكرهم كره العمي و كل قيدات الجيش حاطينهم علي راسهم وزاعقين من زمان و انتوا سيد العرفين العسكر ماكانوش مع مشروع التوريث مش لأنهم كانوا عاوزين رئيس مدني لا سامح الله …لأنهم عاوزين رئيس من المؤسسه العسكريه كما عادتهم منذ ثوره يوليو المجيده و من بعدها عبناصر الله يسامحه عمره مارضي يرجع الحكم للمدنيين و تبت في الكرسي و من بعده كل واحد حكمنا تبت في الكرسي و دلوقت المجلس العسكري متبت في الكرسي لغايه مايقعد عليه حد منهم و عليهم و احنا نطلع أوت!

بس بالرغم من الاعيب المجلس اللولبيه عرفنا ناخد اللقمه من حنك السبع بسبب قدرتنا علي التظاهر و التعبير عن رأينا . دلوقت عاوزين يكتمونا ليه؟ و طالقين سلاحف الننجا تقفش الناس ع القهاوي ليه؟ هو قمل الدوله رجع و لا ايه؟

لو ماعرفناش ندافع عن حقنا في التعبير عن الرأي يبقي نقول يا لاه السلام و هترجع ريمه لعادتها القديمه ! حريه التعبير عن الرأي خدت قلم علي وشها لأن المجلس من يوم ما طلع علينا بحكايه الخط الاحمر خدها حلوانه فسلوانه و بيقبض علي مدنين علي أساس ان نقد المؤسسه العسكريه لا يصح …ليه بقي انشاءالله ؟ هو احنا عملنا كل ده عشان يبقي في خطوط و يصح و مايصحش؟ لا بقي يا عم  أنا متمسكه بحق النقد و حريه التعبير للجميع و حتي لو الكلام اللي بيتقال كلام أهطل . لأن لو سجننا المهاطيل عشان بيقولوا كلام مهطول تخيلوا بقي انتوا حجم السجون هتبقي ازاي؟ و بعدين ماالرجل بتاع غزوه الصناديق قال كل اللي في نفسه ليه ما أتقبضش عليه؟ و لو اتقبض عليه أنا هدافع عنه ! من حقنا نرد عليه و نقوله ايه ياجدع عيب و انت أهبل و لا ايه ؟ ولا حتي يمكن ربنا ينفخ في صوره مثقف و يتحاور معاه بالتي هي أحسن ! لكن انه يتسجن عشان عبر عن هطله لا ممكن أبدا !  أنا ضد حبس المدنيين بتهمه التعبير عن افكار هطله مش لاده علي المجلس ولا علي غيره و ضد محكامه المدنيين أمام المحاكم العسكريه و كروته المحاكمات من غير دفاع ف الوقت اللي بيستمتع فيه فاسدين نظام مبارك بالاقامه في منتج طره و الاستفاده من حبال العداله اللي يتفاتلها بلاد بزيها.
الخلاصه ايه ؟ ان شعار الحريه و العداله بيتداس عليه بجزم العسكر!
هنسكت؟

Advertisements
نُشِرت في Uncategorized | الوسوم: , | 2 تعليقان

احداث 9 ابريل

اهو ده اللي صار
وادي اللي كان ملكش حق
.ملكش حق تلوم عليا
تلوم عليا ازاي يا سيدنا
وخير بلدنا مهوش في ايدنا
قولي عن اشياء تفيدنا
و بعدها بقي لوم عليا

هو كل يوم تسعه في الشهر المجلس نادر ندر يسيح دمنا و لا ايه …أنا مافييش دماغ احلل و اتلكم و اتنيل أنا هقول كلمتيين عن اللي حصل فجر 9 ابريل في التحرير لأني كنت هناك

حوالي الساعه انتين و نص و لا تلاته الصبح كونا كافيين خيرنا شرنا و العيال قاعده تغني و فجأه هجموا علينا الشرطه العسكريه و الامن المركزي و بما ان الجري نص الجدعنه أنا دورت الجري أنا و كم بنت و ست و دخلنا عماره ف شارع طلعت حرب جنب عمر افندي و طلعنا فوق فأخر دور و كم واحد طلعوا يبصوا من السطوح علي اللي بيحصل , الشرطه العسكريه كانت قالفه مدخل شارع طلعت حرب و كانوا بيضربوا نار علي العيال اللي كانوا ناحيه ميدان طلعت حرب و الامن المركزي كان بيضرب قنابل مسيله للدموع  بس بعد شويه العيال قعدت تحدف عليهم طوب قامت الشرطه العسكريه تراجعت شويه لكن كانوا بيضربوا نار و لا فشنك مش عارفه بس صوت الدوي كان جامد قوي قوي و كان مرعب جدا فكرني بليله 3 فبراير لما كونا ف وسط الميدان و كانوا البلطجيه علي كوبري أكتوبر المهم كان ف ضرب كتير في شارع طلعت حرب و البستان و ف باب اللوق كمان هتقولوا عرفتي ازاي ؟ عرفت لأن كان في ناس بتتصل بيه و أنا مزنوقه فبير السلم و بيدوني أخبار عل اللي بيحصل بره  . المهم قعدنا كده ساعه و لا أكتر شويه يمكن لحد ما حد من الناس اللي ساكنين فالعماره قالنا ان الوضع بداء يهدي و ان الشرطه العسكريه جالها اوامر بالانسحاب و فعلا انسحبوا المهم و نزلنا الشارع تاني و لاقينا بقي الاتوبيس المحروق اللي المجلس داير علي وكالات الاعلام يعيكط عليه و يقول البيلطجيه الوحشيين حرقوا عربيتنا …

أنا هحط كل شهاده الاقيها عشان تعرفوا اني مش كذابه و ان اللي كانوا امبارح ف التحرير مش بلطجيه و الكلام الفاشل اللي سمعته قبل كده بس مش فاكره سمعته فين …سمعتيه فين يابت يا محاسن خير اللهم ماأجعله خير …مش فاكره

أولاكشي عشان ماتقولوش ديه أخبار مضربوه

المصري اليوم دول موثوق فيهم : الجيش يفض اعتصام «ضباطه» بالقوة

المصري اليوم : تقرير فيديو فيه كذا شهاده و منهم راي وائل الابراشي

حتي اليوم الساقع ربنا فك عقده لسانه : بالصور.. “الصحة” :  قتيل و71 مصاباً فى أحداث ميدان التحرير

علي عهدته و ربنا هيحاسبه علي شهادته : شهادة الصحفى الحسينى أبو ضيف عما حدث فى ميدان التحرير منذ قليل

بوابه الوفد الاكترونيه  : إحدى شاهدات العيان تروى تفاصيل حادث مساء جمعة التطهير

المجلس كتر خيره قبض علي أجانب بلبس عسكري ههههههههه : الجيش: سنخلي «التحرير» بالقوة.. وقبضنا على 42 بينهم 3 أجانب ومرتدين للزي العسكري

و المجلس يكذ ب هههههه و يوكذب هههههه هبقي ارجع للنقطه ديه بس خدوا تقرير ال بي بي سي تصبيره لأني تعبانه و مانمتش من زمان مش فاكره أخر مره كانت امتي هروح ارتاح و هفضي لاكاديب المجلس اللولبيه

المجلس العسكري في مصر : سنمنع بحزم وقوة الاعتصام في ميدان التحرير عند حظر التجوال

بمناسبه الكدب بتاع المجلس الكاذب : ابراهيم كامل اللي المجلس طلع بيان مخصوص عشان يقول انه كان في التحرير و هو السبب في الليله ديه كلها …مفاجأه من العيار التقيل …أنأنأنأنأ….الرجل كدب الخبر

المصري اليوم : إبراهيم كامل ينفي تورطة في أحداث الشغب بـ«التحرير».. ويؤكد: «تشابه أسماء

 

نُشِرت في Uncategorized | الوسوم: , , | أضف تعليق

كل فوله و لها كيال و كل طاغيه و له عمرو أديب

سيقولون:
جئناك كي تحقن الدم..
جئناك. كن -يا أمير- الحكم
سيقولون:
ها نحن أبناء عم.
قل لهم: إنهم لم يراعوا العمومة فيمن هلك
واغرس السيفَ في جبهة الصحراء
إلى أن يجيب العدم
إنني كنت لك
فارسًا،
وأخًا،
وأبًا،
ومَلِك! (لا تصالح – أمل دنقل)

ايه حكايه الاخ اللي اسمه بلال فضل باللصلي ع النبي ماله ده هوشكله كده و لا سحليه مشيت علي قفاه صحي الصبح لاقي نفسه في الحاله ديه اللي لا تسر عدو و لا حبيب … حقه يا ولاد أنا خايفه عليه بصراحه من جنون العظمه اللي ممكن يتسبب فيها التليفونات اللولبيبه الاستراتيجيه المجلسيه الهرتليه الهطليه …اي و الله… حكم احنا شعب حساس و حكايه التليفونات اللي نازله ترف عليه ديه ممكن تودي أي حد فينا العباسيه احنا مش حمل الكلام ده أه …هو احنا ليه دايما متصابيين في مثقنيننا ليه كده يارب ليه…ده احنا غلابه و مش ناقصينهم والله

هموت و أعرف هو ليه فجأتا و فجأه بلال فضل بقي المتحدث الرسمي باسم المجلس العسكري ده حتي المجلس كبير قوي و جامد قوي و لسانه بسم الله ماشاء الله يوزن بلد بزيها هو ليه الاخ بلال تاعب نفسه قوي كده و قاعد عامل فيها مطيباتي هو كان جيشه لوحده و لا ايه العباره بالظبط …الجيش جيشنا كلنا و المجلس بتاعنا كلنا و حقنا بقي نقوله يا أيها المجلس انت مش بتشتغل كويس و بقالك شهرين ماسك الحكم و ماعملتش ايتها حاجه خاص خالص

و غير كده بقي أنا مش عاجبني اسلوبه في التلييف مع الحكومه قال ايه شرف بيقوله الأتي :

أخيرا ختم الدكتور عصام شرف مكالمته بأن ملف التعذيب الذى تعرض له بعض الناشطين السياسيين يتم التحقيق فيه بجدية شديدة وأن المجلس الأعلى للقوات المسلحة تعامل مع الأمر باهتمام شديد، وأكد أنه لن يسمح بأن يضيع حق هؤلاء أبدا

و النبي ايه يعني في تحقيقات و الذي منه و الناس مش هيضيع حقها ابتا ابتا و النبي قلبنا ارتاح ربنا يريح قلبك و يفك سجنهوم قادر يا كريم … بس مش مصدقاك يا بلال و شرف كذاب في اصل وشه

أمال الناس لسه متشحتفه علي ولادها ليه اسمعوا الشهادات  ديه متسجله يوم 5 ابريل يعني أول امبارح

شهاده أم وليد

شهاده أم محمد

شهاده محامي عن المحاكم العسكريه

و لا دول كمان قله مندسه و ثوره مضاده و لا أجندات و لا جايين من المريخ ينموا في حق حبيب بلال فضل ويوسخوا سمعه فلذه كبد نواره نجم و بعدين من حق تعالي هنا هو مش المجلس طلع كدب كل الكلام ده و من المفروض ان مافيش حاجه من ديه حصلت و الناس لا اتضربت و لا اتعذبت و لا أي حاجه !!!!

عيب يا جماعه اللي انتوا بتعملوه ده عيب ده اسمه تواطء و تزييف حقائق و افتكر انكوا صحفيين و في الغالب من المفترض انكوا عارفين قواعد الشرف الاعلامي من المفروض يعني و لا ايه و لا احنا كده دايما مستباحيين لكل من هب و دب

.أما عن المكالمه التانيه هي ديه اللي عليها العين و الطلق و الكلام كله المكالمه ديه يا أخواننا بصريح العباره كده دعاره أي و الله … دعاره مش اللواء شاهين كان طلع شرشح و قال اللي ف نفسه كله و كمان طلع بعديه اسمه ايه ده و عمل فيها لتتيف و الموضوع كان انتهي و مات من بعده المجلس ايه بقي اللي بيعمله السيد الفاضل بلال فضل بيدي للمجلس قبله دعاريه الغرض منها اعاده شحن الحيويه للمجلس علي أمل ان الروح ترجع له مره تانيه تقوم الناس تحبه من جديد و ترجع لهطل الجيش و الشعب ايد واحده…يفتح الله يا خويا الشعب شاف اللواء شاهين علي حقيقته و هو بيزعق و بينهق  و بيطول لسانه علي ناس محترمين و ملتزميين  كل الالتزام بأدب الحديث و الرجل يسري فوده بقي وشوه يجيب كل الاوان ومش بعيد كان قاعد يقول في سره , سلام قولا من رب رحيم , يجعل كلامنا خفيف عليهم  اياك تعدي الليله ديه علي خير و أعرف أروح للعيال… الرجل كان قاعد مش عارف يرد و التاني مبرطع و لسانه عشره متر (اقروا البوست اللي فات)

لاء و ألف لاء يا بلال يا فضل انت و نواره نجم مش هنسمح لحد فيكوا يمسح لاي حد جوخ علي حسابنا لاء … الناس اتضربت و اتمسح بيها الارض في المتحف المصري و انتوا بتحسسوا علي ابوكوا المجلس كنتوا فين و الناس كانوا متكتفيين و مرميين ع الارض في المتحف المصري كنتوا فين لما المعتصمات اتعمل عليهم اختبار عذريه وهم مش صيع و لا داعرات …تيجي دلوقت تقولي ان شاهين ما كانش قصده و ما ادرك ايه …ايه الاستنطاع ده

للأمانة توقعت أن يكون (شاهين) غاضبا مما كتبته، لكنه على العكس كان ودودا جدا، وقال بكل تواضع إنه يتفق معى فى كل ما كتبته، وأن الانفعال جعل الكثيرين يفهمون كلامه خطأ

طاب ايه رايك بقي ان ماحدش فهم كلامه خطاء و احنا نفهم علي الجنب اللي يريحنا , احنا ماروحناش اتهجمنا عليه من الباب للطاق هو اللي طلع علينا زي عفريت العلبه و احنا قاعدين نسمع التلفزيون و قعد يقول كلام ماسخ بس كلام حقيقي تماما و من قلبه علي حد كلامه , و من القلب للقلب رسول و كلامه بقي وصلنا في العضل و فهمنا منه المفيد كله . فهمنا منه ان المجلس العسكري زهق و فاض بيه الكيل من شويه العيال بتوع الثوره علي شويه الاساتذه اللي طلعنا بيهم من الدنيا و اتهفوا فعقلهم و قالوا كلمه حق…وقالوا ن الاعلان الدستوري ما هو الا اعلان ديكتاتوري و ان المجلس العسكري استفرد بالقرار و اعتبر ان التصويت بنعم للتعديلات مبايعه للمجلس يعمل مابداله . من الاخر كده , لو بلال فضل مش فاهم الكلام ده يبقي يرجع كليه اعلام من سنه أولي عشان يتعلم قرائه الخبر الصحفي و كيفيه تحليله و الشعب المصري مش محتاج يدخل كليه اعلام عشان يفهم اللي بيتقال علي لسان هؤلاء المقذذين من أمثال اخواننا بتوع المجلس …ده احنا يابه اتعلمنا علي ادين التلفزيون المصري ابو الخدع كلها و الاكادب و الاحاديث اللولبيه …و النبي يا جماعه بطلوا تستخفوا بعقلنا عشان نكسب وقت كلنا علي بعضنا احنا زهقنا بقي من الاستهبال ده ..اطلعوا من نافوخنا و روحوا كلوا عيش علي قفي حد تاني

و بعدين هو الثنائي نواره فضل و بلال نجم عامليين فيها محامين ليه ضد ظباط الجيش السابقيين بتوع الفيديوهات ما اللي ينزل مظاهره ينزل و اللي يقعد فأمريكا يقعد و اللي عاوز يلبس مايوه يلبس اللي عاوز يخلل خيار يخلل… هو مين عينهم أوصياء ع الرأي العام و كل ماواحد يتكلم يصادروا عليه ليه…هموت و افهم …طاب دلوقت احنا كلنا شوفنا الفيديوهات ديه و لا لها أي لازمه اساسا … بس معلش خلينا ورا بلال ل فضل دلوقت احنا قدامنا حل من الاتنين :

الحل الاول : الفيديوهات ديه مظبوطه و دول ظباط سابقين و قرفانيين من الجيش و نفسهم ينظف و يحصل فيه تغيير حقهم يا جماعه ما هو بالعقل كده بلد بحالها مليانه فساد وزير دفاع بقاله 20 سنه في الوزاره و وزارات تشيله و وزارت تحطه و هو لسه قاعد طاب تيجي منين ديه معقول يعني مبارك و نظيف و عزمي و العادلي و مين تاني …و الكل كليله فاسدين و طنطاوي هوالوحيد اللي نظيف …ازااااااااااي؟ تيجي منين ديه …ده حتي التفاحه المعطوبه بتبوز البتنجان كله …

في الحاله ديه الظباط دول مش موافقين ع اللي بيتعمل و اللي اتعمل في المؤسسه العسكريه و كارهيين قياداتهم و حاطينهم علي راسهم و زاعقيين …خلاص ينزلوا مظاهرات ما ظباط الشرطه نزلوا مظاهرات و عملوننا ليله بنت وسخه و قعدوا يبوسوا الناس في التحرير و جابوهم في التليفزيون و عملولهم زفه يعني هم بتوع الجبش اللي وقعوا من قعر القفه …الاه …هي البلد ديه مش هتخلص من عقده الخيار و الفقوس و بعدين هي نواره نجم ايش عرفها بالقوانيين العسكريه و تقول ليه لونزلوا بالزي الرسمي يعني انقلاب ايه الهطل اللي هي فيه ده و هي ايش حشرها في الحكايه ديه و ليه تقول لو شوفت حد فيهم هسلموه للشرطه العسكريه …ليه كده عيب … عيب عليها هو احنا من كتر الخوزقه بقينا مدمنيين خوازيق و لا ايه …بلاش قرف و بأماره ايه تقول ان لو الظباط نزلوا يتظاهروا يبقي المشير ماعرفش يربيهم ايه السفاهه ديه يعني الناس بتطفح دم قلبها عشان عيالها تدخل الكليه الحربيه للأجل ما المشير يربيهم …ده كلام يا جدعان برده و الله العظيم ده عيب و قله ذوق و سفاهه

الناس بتوع الفيديوهات دول مالهومش عندنا غير حاجه واحده فقط لا غير : الثوره ديه ثوره شعب مش ثوره جيش و ظباط الجيش السابقيين و اللاحقيين و الحاليين زيهم زي اي حد في الشعب من حقهم يطالبوا بحقوقهم و ينزلوا الشارع و قت مايحبوا و المظاهرات مفتوحه عالبحري و الميادين العامه شرحه

الحل التاني : الناس دول مهفوفين فعقلهم ومهاطيل و عاوزين يبوزا مظاهره 8 ابريل …مش غريبه ديه هي في ناس عاوزه تبوز مظاهره تقول احنا هننزل مظاهره؟ منطق ايه ده بالظبط و الاخ بلال فضل بيقول

لم أكن فى حاجة لمشاهدة «الفيديوهين» لكى أتأكد أن هناك أصابع خارجية تسعى لإثارة الفتنة بين الجيش والشعب

ههههههههههههههههههههههههه فين كنتاكي فين الاجندات هههههههههههه فين تامر بتاع غمره …فين عمتوا عفاف … فين الجنس الجماعي و الاخوان ..الفيديو فيه سم قاتل …لا تتعاطوا هذا النوع من الفيديوهات المفسده للاخلاق ؟؟؟

هم ماسمعوش الكلام ده في التلفزيون المصري و لا ايه و لا هو كل واحد يطلع يقول كلمتيين علي هواه يوقولوا عليه أصابع خارجيه و يبقي خاين و متمول  من اسرائيل و ايران و أمريكا و كوريا الجنوبيه …و لا هو قال كوريه الشماليه باين …مش عارفه بقي  أنا طول عمري بليده في الجغرافيا  بعيد عنك و عن السامعين اصل أنا علي حد قول السيد بلال فضل من ضحايا نظام التعليم المباركى الذى أنتج أجيالا لا تعرف الآراء المركبة لكن الحق يتقال ان بلال فضل علي حد قوله برده من الناس الذين لا تعترف إلا بمن ينحاز عميانى لمن يقود البلاد أيا كان ايون يا سيدي الفاضل انك تنحاز  بشكل عمياني لأسيادك الذين ف المجلس لأنه بكل بساطه لو الظباط دول كذابين و مندسيين و عملاء  و عاوزين يوقعوا بين الشعب  و المجلس العسكري علي المجلس شخصيا الدفاع عن نفسه و نشر حقيقه امرهم و اصلهم و فصلهم و انت كصحفي ممكن تهتم بحاجه مفيده علي سبيل المثال لا الحصر التباطؤ الغريب في محاكمه أل مبارك أو التسأل عن كيفيه اقامتهم علي قفانا و بدم قلبنا في شرم الشيخ معززين مكرمين  … مثلا …بأماره ايه أختك نواره دايره تجمع توقيعات عشان الثالوث الاقذر يقف بس بس بس قدام النيابه و العداله تاخد مجراها …يعني حاجات من دي و انت أدري بقي بشغلك و بطل تعمل فيها مطيباتي للجيش …ديه حتي أخره خدمه الغز علقه و في يوم من الأيام قريب انشالله سينشكح المجلس المبجل و هتطلع انت علينا كده زي عمرو أديب فزمانه تنهنه و تقول يا أخواننا ده احنا كونا فأيام سوداء …ابقي اسأل عمرو أديب قال ايه و هو هيقولك مش هيبخل عليك و الله …الرجل كله كرم

و عشان أنا طولت عليكوا

في ناس كتير مابقتش عارفه راسها من رجليها و أنا أولهم و في ناس كتير بتتسال طاب لو دخلنا في صدام مع المجلس العسكري هنعمل ايه و هيبقي حالنا ايه … سألت نفسي الاسئله ديه كتير و لاقيت ان احنا محطوطين قدام نفس المعادله بتاعت مين تاني ممكن يحكم البلد غير جمال مبارك بعد ابوه …و هذا الشبل من ذاك الأسد و الحاجات ديه … لكن عاوزه اقول ان يوم ماخالد سعيد اتقتل في الشارع عرفت ان عهد مبارك مافاضلش عليه غير كم شهر و لما كنسيه القدسيين اتفجرت عرفت ان نظام مبارك مابقاش فاضل عليه الا ايام و حصل …و كلامي دين عليه ليوم الدين …أنا بقولكوا دلوقت ان الناس خرجت في الشوارع تطالب بالعداله و الحريه ماحدش خرج عشان جعان الناس خرجت عشان تطالب بكرامتها …و لا أنا غلطانه …قلولي لو أنا غلطانه أنا ناعنديش مانع أعترف بغلطي

من أحد مطالب الثوره  كان مطلب المجلس الرئاسي المكون من أغلبيه مدنين و عسكري منتخب مافيش مانع لكن المجلس العسكري عامل ودن من طين و ودن من عجين و حتي طلعوا النهارده يقولوا ان مستحيل و من سابع المستحيلات يبقي في مجلس رئاسي …ليه.؟ مش عاوزين مجلس رئاسي ليه؟ السطله مش هاينه عليهم للدرجه ديه و اياكش احنا بنصدق انهم خافيين ع البلد قوي كده و لا العباره ان لو المجلس العسكري خرج من السلطه هيدخل تاني يوم السجن الحربي

عاوزين مجلس رئاسي …أنا شايفه ان ده الحل و لو الجيش محل ثقه بلال فضل فعلا و عنده سعه صدر للدرجه اللي بيقول عليها ديه يبقي لما يتكلم مع حد منهم في التليفون يقولوه الشعب يريد مجلس رئاسي و يبقي يقوله برده ان الشعب يسلم علي الاعلان الاسطوري حطوه مطرح ما انتوا عاوزين

و ماحدش و النبي يجي يقولي اصل بلال فضل و الاخت نواره بيلييفوا المجلس عشان يتكسف علي دمه و يحترم مطالب الثوره و يحققها …اللي محتاج تلييف عشان يحترم أي حاجه و لا أي حد ليس محل ثقه و اللي بيلييف مسؤل عشان يكسر عينه يبقي متغطي بالهوا لأنه هيجي عليه يوم و المسؤل يتدور عليه و يلطشوا علي بوقه

احنا عاوزين مجلس رئاسي و الجيش حبيب الشعب يحمينا كلنا علي بعضنا من ضغيرنا لكبيرنا و رفض المجلس العسكري ليس رفض للجيش باي حال من الاحوال و الاصتدام مع المجلس ليس اصتدام مع الجيش و بطلب طلب أخير من بلال فضل ابقي قول للمجلس ان احنا مابيخيلش علينا التهديدات اللي بتلاته نكله بتاعت ابونا المجلس

مقال بلال فضل عشان التاريخ  : من يقف وراء فيديوهات ضباط الجيش؟

و أدي مره تانيه مقال يسري فوده عن موقعه الاعلان الاسطوري : الجيش والشعب.. فى أزمة

نُشِرت في Uncategorized | الوسوم: , | أضف تعليق

الفوضي الخلاقه

أحساس غريب يسكني ان كل اللي بيحصل متهندس و مترتب بالرغم من انه بيبان علي انه عشوائي الا ان قطع ودن في الصعيد بترن فاستاد القاهره … الطوفان السلفي علاقته وطيده جدا بالهرتله الاعلاميه الذي لحقت ليله القبض علي أمن الدوله … الفتنه الطائفيه لا تتجزاء عن الفنته الاستفتائيه  …العب يا ملعب  …و كل ده كوم و الأنفلات الامني كوم لوحده … أي و الله …منين يا ولاد الحلال البلد فيها انفلات أمني وبلطجيه و منين عاملين 52 كامين في الفضاء الريفي و الصحراوي و ماحوله من الجغرافيه الاسطوريه عشان يقبضوا علي الوحشيين اللي خطفوا بنت عفت السادات اييييييييييييييه الفيلم الهندي ده …و اللي زاد و غطي اننا من المفروض نصقد هههههههههههه أحه بصراحه

كل يوم بيعدي المجلس العسكري بيثبت فشله بل و غباؤه …أما غبي بشكل!

أنا ماكنتش عاوزه أتكلم عن السلفيين و الهوجه بتاعتهم و تقطيع الودان و كاميليا و الزمر و كل الهالومه ديه بس للأسف هتكلم عنهم و هم كلمتيين وبس ومن الأخر كده مش هو ده البوعبع ابو رجل مسلوخه اللي مبارك و عمر سليمان كانوا بيخافونا بيه و ان كنت ناسي افكرك …ليه فجأه كده طلعوا من الجحر ماتقوليش بسبب حريه التعبير و الكلام ده كله  لا لا لا …السبب الوحيد ان المجلس العظيم عاوز يبث فقلوبنا الرعب و الفزع و لما نقول جاي… جاي لموهم و حوشوهم عننا … يقوموا يلبوهم اللبه اللي هي و يبقوا عملوها بجميله كمان ,أنا قولت هم كلمتين و هزود عليهم كلمه كمان و نخلص من أم الليله ديه حكايه السلفيين زي حكايه البلطجيه بالظبط يمكن أه في كم سلفي لاسعيين زي الرجل المجنون بتاع غزوه الصناديق و جايز كمان في شويه بلطجيه قاموا يصطادوا في الميه العكره لما لقوا ان مافيش أمن ,ماشي مفهومه يعني هي البلد عمرها داقت طعم الامان و لا شمت ريحته أساسا بس ده مش معناه ان السلفيين هيمسكوا الحكم زي ماكانش له أساس من الصحه حكايه  البلطجيه اللي اتقبض عليهم في التحرير يوم 9 مارس و الكل عارف دلوقت ان ديه كذبه مجلسيه يعني حكايه السلفيين زي حكايه البلطجيه و الاتنين مسرحيات من اخراج أبونا المجلس الله يعمر بيته

أما عن الفتنه الطائفيه اساسا ماحدش بقي يتكلم عنها لأنها مفقوسه من ايام أخينا العادلي و مابناكلش منها قاموا عملولنا الاستفتاء (أنا اتكلمت عن الحكايه ديه ف بوست فات و مش هرجع لها) المهم ان الاستفتاء نجح نجاح زريع و عمل المطلوب و حدثت الفتنه السياسيه و الناس قعدت تتخانق عن لاء و نعم و عينك ماتشوف الا النور … و الله وكيلي الحق يتقال يعني , المجلس ضرب هنا ضربت معلم بصحيح و حكايه الاستفتاء ديه تكاد تكون الحاجه الناجحه الوحيده اللي المجلس عرف يعملها من يوم مامسك الحكم …اي و الله… أنا بقول تكاد لأن ربنا مسلط غباؤهم عليهم و تسلطهم عاميهم بشكل . فبعد نجاح المسرحيه الاستفتائيه  قاموا بقي عودهم اتشد و قالولك خلاص الشعب بقي فجيبنا الصغنطوط و اعمل بقي قانون تجريم الاحتجاجات و عنها الشعب فاق و قال جري ايه يا مجلس انت اتلحست فعقلك و لا ايه عندك يابه انت رصيدك وشك النفاذ كده علي جنب انت قام مفرمل … ده المجلس يعني

حب يشوط الكوره شمال و هو فاكر ان الشعب بيلعب يمين لكن علي مين يا به دول ديكتاتورتنا و احنا مربينهم علي ادينا دول يسرقوا الكحل من العين و احنا شعب مصر العظيييييييييييييم و عارفين خبث العسكر

قوم ايه بقي المجلس حب يشوطها طويله ف أخر الملعب فقعد يطوحنا شمال و احنا معاه و يطوحنا يمين و احنا معاه برده و اتشال و اتهبد و طلع الاعلان الدستوري الحلو الجميل اللتتيف ده قوم ايه الشعب ضاع منه خالص و فقد المجلس رصيده و قعد يلعب لوحده

ربكوا و الحق أنا كنت خايفه قوي قوي قوي من هذا المجلس لكن الخوف تبخر في ليله الدفاع عن الاعلان الاسطوري لما كنت قاعده كافيه خيري شري و بسمع برنامج أخر كلام بتاع يسري فوده و معاه 3 ضيوف كانوزا بيتلكموا عن الاعلان الاسطوري و بيقولوا فيه القطط الفطسه الناس بصراحه ماجابوش حاجه من عندهم هو الاعلان من نفسه كده عفش و لا له طعم و لا ريحه و لا يتمسح بيه الحزمه اساسا لأنه لا يصلح … المهم هم قاعدين يتكلموا بأدب (لأن أداب الحديث عالموضه قوي) و ذوق و راح طالع عليهم فالتليفون من غير احم و لا لحم الرجل شاهين بتاع الشئون القانونيه في المجلس و قعد يهدد و يتوعد و يتشال و يتهبد ما انتوا عارفين الحكايه (هحط الرابط اللي ماشافش يشوف اهوه) المهم قعد يزعق و يقول عليه الطلاق و بتاع و أحنا انقذنا الثوره و ماعمالناش فيكوا زي اللي بيحصل فليبيا والمجلس العسكري ماحدش ينتقدوه و خطوط حمرا و خطوط بمبي و الحكايه و الروايه الرجل يا ولداه كان متزرزر ع الاخر و النبي أنا كنت خايفه لا يطق له عرق و لا حاجه تبقي موته ع الهوا و حصريه كمان يقوم المجلس يروح بحصرته ع الرجل و مايلاقوش حد يفبركلهم اعلانات دستوريه من بعده …قصر الكلام يا ولاد أنا قلبي اتطمن ع الاخر و قلت خلاص بقي المجلس كشر عن أنيابه و اللي كانوا بيعملوه من تحت لتحت بقي ايه ماشي مشلح ع الاخر من غير أي برقع تعتيم اعلامي مش محتاجه الرجل طلع يخوف الناس قام ضرب نفسه رصاصه فرجله هههههههههه يا عم شاهين احنا ماعودناش نخاف خلاص و الله مش بنخاف

المسرحيه كملت بقي لما طلع اللي مايتسمي (هو مش بيقول اسمه لما بيطلع علي التلفزيون مش بيتكشف علي جمهمور …بس اقطع دراعي من لغلوغه ان ماكانش طنطاوي بس بيتكسف يقول …ماهي حاجه تكسف…المهم ماعلينا مين هو) فالمسرحيه كملت لما طلع اللي مايتسمي يطبطب و يصالح و يليف و يقول ازاي ده الجيش بتاعكوا و الشعب و الجيش مش عارفه ابصر ايه و معلش ده ابوكوا شاهين بعافيه و تعبان وعنده ارهاق دستوري و كان ناقص يقول ليسري فوده و ضيوفوه ماتجيبوا بوسه و انتوا مابتجوش ليه …ماتبقوا تيجوا …تحالي لحموا يا حبيبي

أنا بقي لما شوفت البتاع ده قلت تمام هم كده كشفوا نفسهم بنفسهم و مش محتاجين بقي نقعد نعمل بوستات علي الفيس بوك و نقول الجيش بيعذب المتظاهرين و الشعب و الجيش مش ايد واحده و الكلام ده كله … هم ربنا مسلطهم علي نفسهم

بالكوا انتوا المجلس العسكري عنده ازدواج ف الشخصيه دايما يعملوا حاجه و يقولوا عكسها و يقولوا حاجه و يرجعوا يكذبوا عاملين فيها حضراتهم مسرحيه الشرير و اللتتيف …دكتور جيكل و مستر هايد واحد يطلع يهدد و يخوف و التاني يطلع يحسس… ايه ده يا مجلس ايه الفشل ده كله و النبي انتوا بالمسرحيه الهابطه ديه بوظتوا خالص فتنه الاستفتاء و مالحقتوش تفرحوا بيها لأن الشعب قال لاء لمجلس الأباء …الشعب قال مش عاوزين أوصياء علينا كفايه علينا لحد كده و بدل ما تقعدوا تفكروا بشكل منظم و مهندم و تكتيكي هتلبسونا الخازوق ازاي و هتأكلونا البالوظه منين الاخ طالع ينهق و يهدد …العب غيرها …لقد نفذ رصيدك و نحن لا نخشي البعير

ارتحت و قلبي اتطمن منذ هذا اليوم العظيم اللي فكرني بموقعه الجمل الشهيره لما مبارك و اتباعه ضربوا لنفسهم كرسي فالكلوب  و بعد  ما الناس كان قلبها حن و قالت خلاص بقي نسيبه الست اشهر يخلصهم و يتكل … فاكرين يا جماعه… قاموا طلقوا الجمال و الجحوش علي الناس في الميدان و لولاهم (الجحوش) لاكان مبارك زمانه قاعد علي قلبنا و ذلك الغباء هو  بعينه غباءاللي طلع ينهيق في برنامج يسري فوده و خلاص بانت الفوله و انكشف المستور

الخلاصه ان المجلس اخد فاول ف الليله ديه و الحكايه خرجت من ايده خالص و مابقاش عارف يعمل ايه لأن ابائنا بتوع المجلس متعودين علي انهم يدوا أوامر و الاخريين يقولوا سمعا و طاعه …لكن احنا ماعودناش نطيع الطغاه و الفاسدين و لا بنسمع غير كلمه الحريه و من حسن حظنا انكوا أغبياء و انكوا فاكرين ان الناس أغبياء  و ان كل الفوضي اللي بتحصل اليوميين دول هتخييل علينا و ان احنا هنتلهي في السلفيين و مطشات الكوره التعبانه و نمسك ف خناق بعض بسبب لاء و نعم و غزوه الصناديق و ننسي ان احنا  ورانا ثوره و مطالب لسه ما اتحققتش لا يا ابه المجلس انسي انت …نحن لن و لم ننسي …احنا مشينا في شوارع مصر و العالم كله اتهز لخوطتنا اوعي تفتكر انك تقدر تأكلنا البالوظه  و لا بينضحك علينا
احنا المصريين في وسط كل هذه الفوضي معني و انت يا ايها المجلس ليس لك أي معني

مقال يسري فوده عن هذه الموقعه : الجيش والشعب.. فى أزمة

نُشِرت في Uncategorized | الوسوم: , | أضف تعليق

دستور …يا أسيادنا

أسوأ ما فعله «مبارك» أنه أصاب مصر بالنعاس لذلك أتشاءم من عودة إعلانات المراتب والبطاطين الآن (جلال عامر)

فين الاعلان الدستوري اللي بيتكلموا عنه من يوم 20 مارس …فينه هه فينه … و لا هم كانوا مستعجلين ف كروته الاستفتاء و دلوقت ماشيين علي اقل من مهلهم زي كروته محاكمه الناس قدام المحاكم العسكريه بس الناس الكبار اللي الفساد طالع من نافوخهم  بيتحاكموا ف محاكم مدنيه و محاكمتهم ماشيه نونو نونو علي اقل من مهلمهم هو احنا لسه عندنا فقوس و خيار أه يا بلد

ماحدش فاهم ليه اعلان دستوري من أصله الجيش كل يوم يطلع علينا بخبر و يرجع ينفيه تاني يوم زي ماقال ان انتخابات الرياسه هتبقي في يونيو 2012 و بعدين رجع كذب الخبر …مين الكلب اللي يجرؤ يطلع اشاعات علي حبيب الشعب و لما الاعلام وسخ للدرجه ديه ليه مش بينظفوه و يخلصونا و ليه كل ما نطلب منهم حاجه لازم ينشفوا ريقنا عشان يعملوها و ليه احنا …الشعب يعني …اتزنقنا ف خانه الشحاته …اه احنا عمالين نشحت من ابه المجلس كل كبيره و صغيره و لما يتف علينا تفه نفرح و نشكره و نقوله كماااان

يعني امبارح اتفضل و بكل سماحه قال طاب  يا ولاد هنعيد محاكمه عمرو عيسي الناس قعدت تصقف و تهلل و نواره قعدت تزغرت و العيال وزعوا شربات عشان هيعييد المحاكمه ايه الهنا اللي احنا فيه ده يا خواتي …بس ف نفس الليله , يعني امبارح بالليل , قبضوا علي المدون مايكل نبيل الناشط  السياسي …هجموا ع الرجل بالليل و جابوه من بيته عشان خاطر كلامه مش عاجب ابائنا  الذين في المجلس يا سلاااااام كله ده عشان قال ان الجيش و الشعب  عمرهم ماكانوا ايد واحده طاب و الله العظيم تلاته الرجل عنده حق و اقروا المدونه بتاعتوا و احكموا بنفسكوا و علي اي حال لو الناس مش موافقه علي رأيه يردوا عليه برأي تاني مش بحبس الرجل و اقتحام زوار أخر الليل بيته ايه الوكسه اللي احنا فيها ديه

قصر الكلام أنا ماكنتش عاوزه اتكلم عن ماكيل ف حد ذاته أنا عاوزه أتكلم و بالتحديد عن مخطط تنشيف الريق اي نعم المجلس يستهدف ريق الشعب و مرارته انتوا مش ملاحظين ان احنا كل مانطلب طلب لازم نقعد نهاتي و نقول عاوزين شفيق يمشي عاوزين شفيق يمشي و هم كده كده كانوا هيمشوه بس استنوا لغايه أخر لحظه لغايه ماريقنا ينشف و مرارتنا تتفع و بعدين مشوه, و احنا نفرح و نزغرت و نرقص و نحب علي ايده و نقوله تشكر يا ابه الجيش , و بعدين رجعوا نشفوا ريقنا بسبب التعديلات الدستوريه  و عملولنا المسرحيه الهزليه المسماه  الاستفتاء و الناس طلعت تطبل و تزمر و يقولوا عرس الديمقراطيه …عرس ايه يا هوبل هو عشان لون الحبر كان بمبي يبيقي عرس … كان ناقص يحطوا أغنيه سعاد حسني و يوقولوا الديمقراطيه لونها بمبي والسلفيين و الاخوان بقوا جنبي …رقصني يا جدع… و دلقوت بينشفوا ريقنا بحكايه دين أم الأعلان الاسطوري بتاعهم ده اللي لغايه دلوقت ماحدش فاهم هم قاعدين بينيلوا ايه و أساسا مين قالهم يروحوا يعدلوا قانون الاحزاب مع نفسهم فين التيارات السياسيه و مين قالوهم يعلموا العان دستوري مع نفسهم …الناس قالت لجنه منتخبه و هم ودن من طين و ودن من عجين .

فين الحوار الوطني اللي الكل كان بيتكلم عنه واللي اتنسي دلوقت و شرب الدهر عليه و طرطر و خدوا عندكوا بقي …برده بينشفوا ريقنا بحكايه الثالوث الاقذر المكون من صفوت  الغير شريف و فتحي شرور و زكريا حزقي هم بيستخدموا الثلاثي المرح ده ككروت  يلاعبونا بيهم لأنهم عارفين تماما ان الناس مفقوعه منهم فكل شويه يطلعلنا واحد منهم في مداخله تليفزيونيه يقول لا أنا تمام و قاعد ف حالي و مش ناوي أترشح في الانتخابات اللي جايه عشان أسيب بقي المكان للشباب الجميل اللي قام بالثوره الجميله الطاهره …كلابالا يا حلوه يا جميله انتشي…حصلنا الفشخ

بالظبط كده …هو ده الهدف ان يحصلنا الفشخ و نقوم نتشال و نترزع و نعمل طلبات و توقيعات و حاجات و محتاجات و أعصابنا تبوز و رقنا ينشف كمان وكمان … و اديله بقي الرأي العام شغال رغي عن العالم ديه و ناسي (و لا عامل نفسه ناسي) ان الثوره بتتسرق من تحت لتحت ومصدر الطرشه لمصيبه العالم اللي بتتحاكم محاكم عسكريه و كل يوم بيعدي علينا في حرب تنشيف الريق بيستنزفزنا  أكتر و اكتر و بننسسي مطالب الثوره اللي لغايه دلوقت ما تحققتش واللي فاض وزاد ان احنا بقينا دايريين نشحت من أبونا المجلس تحقيق مطالبنا و هو يمن علينا كل شويه و يقول طاب لما اشوف هعييد النظر ف كيت هعمل ابصر ايه …احنا بنشحت منهم ليه ….الثوره ديه ثوره الشعب… ثوره الناس اللي نزلت الشوارع تقول لا كفايه ظلم …كفايه قهر الثوره ديه قامت مش عشان الناس جعانه… ما احنا بقالنا قرون جعانيين… لا … الثوره قامت بسبب فجر (بضم الف) كلاب السلطه ,الكلاب الصعرانه اللي بيسموهم شرطه , و ظلمها للناس … الثوره  قامت عشان الناس شافت ان عيالها ممكن تنزل الشارع مشوار تقوم تتضرب في عز الظهر لغايه ما تموت و بعدين يطلع وزير الداخليه و الاعلام الوسخ من وراه يقولوا اصل ده كان واد حشاش و مات  لأنه بلع اللفافه …خالد سعيد كان حشاش و معتصميين التحرير بلطجيه … اه صح مش الحشاش ابن عم البلطجي و لا ايه يا مجلس هو احنا نخلص من قرف العادلي يطلعنا استطنتاع المجلس

ليه احنا دايما يتقال علينا  صيع و بلطجيه و حشاشين و عاهرات لما نعمل حاجه ماتجييش علي هوي أسيادنا اللي فوق …يجعل كلامنا خفيف عليهم

أحنا عملنا ثوره و كان لينا مطالب محدده و كانت مكتوبه بالخط العريض ف التحرير عاوزين المطالب ديه تتحق … مش هنشحت من المجلس أي حاجه و كفايه بقي …احنا لينا حقوق بنطالب بيها …مش بنطلب حاجه عيب و لا مؤاخزه و العيب هو اللي بيعمله المجلس المبجل لأن سلوا بلدنا علمنا ان ايه … ان حاميها حراميه …و كل ده من بركه مبارك و عمايله , طبعا احنا عندنا استعداد رهيب ع النوم في العسل و مبارك وو من بعده المجلس عرفوا يستغلوا قدراتنا و موهبتنا ف النوم و التشخيير

صح النوم يا ثوره …و أمانه علي أخواننا المثقفيين يا يعمولوا حاجه عليها الطلق يا يتنيلوا يسكتوا ويريحونا


نُشِرت في Uncategorized | أضف تعليق

مافيش ظلم تاني …مافيش خوف تاني

الجنوبي يا سيدي يشتهي أن يكون الذي لم يكنه يشتهي أن يلاقي أثنين : الحقيقه  و الأوجه الغائبه

الايام اللي بنقول عليها أيام الثوره يعني الفتره من 25 يناير الي 11فبراير كانت من المؤكد من أحلي أيام عاشها أي مصري و في نفس الوقت من أصعب الايام

صحينا لاقينا نفسنا قادرين نحلم … الحلم كان هجرنا من زمان و في لحظه واحده رجع لنا يا سلام اياميها أنا ماكنتش بنام كنت عايشه علي سحابه رجعتني للحلم القديم الحلم اللي كنت نسيته مع سبق الاصرار و الترصد و من اللحظات اللي خلت الدمعه تفر من عيني ( و انا في الغالب قلبي قاسي و سماويه) لما سمعت صوت نواره نجم علي الجزيره و هي بتقول: بشكر تونس مافيش ظلم تاني مافيش خوف تاني

جسمي كله قشعر يا خواتي و حسيت ان فعلا مش هيبقي في خوف تاني و لا ظلم و أنا كمان بشكر تونس لأني لما شوفت بوست علي فيس بوك  مكتوب عليه : أول رئيس عربي يرحل من غير تدخل عزائيل فهمت ان الباب اتفتح وان الحصان المتلجم ماحدش هيقدر يكتفه تاني …الحصان التونسي  خرج م البوكس و بعده كل الخيول الأصيله جرت علي طريق الحريه

يا فرحه ما تمت خدها الغراب و طار

ليه كده ايه الدراما ديه …لا هو كده أنا زعلان, زعلانه قوي قوي قوي لأن الحقيقه ان لسه في ظلم تاني و لسه في خوف

الجيش بيظلمنا و بيكهربنا و بيعذبنا و ده من أول يوم في المظاهرات و الشهود بداوء يكتروا قوي و لدرجه ان بقي مش ممكن ان الواحد يعمل مش شايف و يقول لا لا ده فلول النظام هي اللي عاوزه توقع بين الشعب و حبيب الشعب ,لا معلش ديه بقي حجه الخايب اللي مش عاوز يشوف اللي بيحصل قدامه  و يواجه الحقيقه…للأسف يا اخوانا احنا شعب يفضل يدور و شه عن اللي بيحصل عشان مش عاوز وجع دماغ و لا أنا غلطانه لو أنا غلطانه قولوا …انا هسمعكوا و هاخد برأيكوا

احنا شعب يفضل الاستقرار و الامان …سلملي ع الاستقرار هو احنا عمرنا شوفنا استقرار و لا عشنا ف أمان  أنا بصراحه عمري ماحسيت بالامان في بر مصر المحروسه

انا هحيلكوا الحكايه و انتوا بقي عقلوكوا ف راسكوا …تعرفوا خلاصكوا

الحكايه بدأت تبان ليله 25 فبرابر لما الجيش فض الاعتصام عند مجلس الوزرا بالعنف و جروا الناس و ضربوهم و كهربوهم و نواره نجم كانت واحده من اللي موجودين و لما سمعت انها موجوده قلت تمام كده هي هتتلكم و هتقول اللي حصل بس ما اتكلمتش و لا قالت أي حاجه و كتبت ورقه علي الفيس بوك تقول فيها ان الجيش اعتدي عليهم لكن علي المدونه بتاعتها ما قالتش حاجه …ليه ما قولتيش حاجه أنا بصراحه زعلت منك بس ما أخدتش علي خاطري قلت معلش ما فيهاش حاجه هي أكيد خايفه …خايفه …و فجأه رنت في وداني صرختها ع الجزيره و هي بتقول ما فيش ظلم تاني …ما فيش خوف تاني …ساعتها حسيت بالخزل و خيبه الأمل… تاني يوم  الحادثه ديه المجلس  الأعلي طلع علينا ببينانه الشهير بتاع رصيدنا لديكم يسمح … (اقري الخبر بالصوت و الصوره) و الناس سامحت و صدقت , أي و الله ماهو ده سلوا بلدنا و دايما نتضرب علي قفانا و بعدين نرجع نقول الطيب أحسن و يابخت من قدر و عفي و ضرب الحبيب زي أكل الزبيب يعني التراث الشعبي بسم الله ماشاءالله  تقولش حد مسلطه علينا

قصره… الناس سكت و عملت مش شايفه و كذبوا الكدبه علي نفسهم و صدقوها

يا دوبك السيد المحترم عصام شرف مسك الحكومه من هنا و عينك ماتشوف الا النور و الميدان اتفضي من هنا حاولوا كده يفضوه بشويه بلطجيه ماعرفوش قامت الشرطه العسكريه عملت مسرحيه فاشله و قالوا ان اللي في الميدان دول بلطجيه و اديلوه دخلوا ع العالم  مع البلطجيه اللي بصحيح و هاتك ضرب و هاتك اعتقالات و هاتك تعذيب في المتحف المصري سابقا ( الشهيربسلخانه الجيش حاليا) و طبعا الاعلام يطبل و يقول دول بلطجيه و دول بتوع مخدرات و دول بيمارسوا جنس جماعي ….الله الله الله …مش ده الكلام اللي كان بيتقال ع العيال بتوع 25 يناير و بعدين ع المعتصمين ف التحرير من بعد جمعه الغضب, أه نفس الكلام بس المره ديه الناس صدقت  أو كات عاوزه تصدق و تريح دماغها و قالت أحسن خلي الجيش يربيهم هههههههه الجيش يربيهم ههههه يا ادي النايبه يا خواتي بقي الناس طافحه الكوته عشان تربي عيالها و بعدين يجي الجيش  يربيهم يعني ماحدش عرف يربي عياله ف البلد ديه و لا ايه …يا حول الله يارب

البلوي المسيحه بقي مش ف الاعلام ماهو وسخ و احنا عارفينه وسخ و هو عارف نفسه انه وشخ …البلوي المسيحه في العيال بتوع ائتلاف الثوره لما طلعوا كده زي الحلوين الكتاكيت دول و قالوا لبابا الجيش أه يا بابا ابقي اقبض علي أي حد عاوز يعتصم والله العظيم قالوا المقال اهوه

هم مالهم هي البلد ديه كل واحد عامل فيها وصي ع التاني ليه هم مين عينهم وكيل ع العالم ما اللي عاوز يعتصم يعتصم ايش حشرهم …أنا بقي هقول حاجه و ازعلوا مني مش فارقه …الناس اللي اتقبض عليها يوم 9 مارس ذنبهم ف رقبه الائتلاف الرلز اللي اتبري من لسانه وقال ابقوا فضوا الاعتصام و الله ذنب الناس ديه ف رقبتهم و انا مش مسمحاهم و دعيت عليهم …أه هم السبب ادوا فرصه للجيش انه يعمل العمايل السواد اللي عملها و كمان من غير مايطلع يقول أسفين و لا أي حاجه خلاص بقي ما هو عنده تصريح من اللي بيتكلموا باسم الثوره …الكل بيستباحنا الكل الكل مافيش احترام و لا انسانيه …شويه عيال ما صدقوش نفسهم ان مجلس الوزرا و المجلس  التاني بيقعدقهم معاه …عيال تافهه أول ما المجلس الأعلي يقولهم تعالي يا حبيبي …رياله الائتلاف تسيح علي طول , لما انتوا مش قد السياسه بتحشوروا نفسكوا ليه في اللي مالوكش فيه

في ناس كتير اتقبض عليها يوم 9 مارس ناس كتير قوي و النديم موثق كل شهداتهم عشان ماحدش يجي يقول ده توقيع بين الشعب و حبيب الشعب اسمعوا اهوه بالصوت و الصوره رشا عزب الصحفيه اتقبض عليها و اتضربت و اتبهدلت (هحط الراوبط  كلها في أخر البوست) و الممثل علي صبحي نفس الحكايه و ناس تانيه كتيرى اتقبض عليهم برده بس رشا عزب و علي صبحي  حظهم كان أحسن من غيرهم لأنهم معروفين و ناس كتير طالبت بالافراج عنهم لكن في ناس اتحاكموا محاكم عسكريه و خدوا حبس بالخمس سنين  سبع سنين ,الناس ديه مستقبلها ضاع و ائتلاف الثوره عملهم ايه و لا حاجه دخل رأسه في كتافه و اتخرص و أنا كل يوم اقري الجرايد و أدخل ع الفيس بوك و اقول يا جدعان الحقوا الجيش طايح في خلق الله و لا حياه لمن تنادي لغايه ما قررت أكتب المدونه ديه لأني هطق من جناني يا خواتي مش قادره الجيش بيتصرف بطريقه اشبع و أشرس من أمن الدوله و الأمن المركزي  مع بعض لان الشعب لا يسمع لا يري لا يتكلم و خصوصا المثقفين …حبيابي دول بالندوات بتاعتهم …  أتكلموا يا مثقفينو أتكلموا … زهقنا بقي من الظلم زهقنا يا عالم يا هوه أصحوا أصحوا الثوره ضاعت و النظام البائد هو النظالم الحالي ما فيش حاجه اتغريت , أي نعم حسني مبارك اتخلع لكن الدكتاتوريه لسه صاغ سليم و المجلس الأعلي قايم بالواجب

انتوا عارفين ابونا الذي في المجلس الأعلي عمل ايه ف البنات اللي اتقبض عليهم يوم 9 مارس …عملوا عليهم كشف عذريه و قلعوهم ملط قدام الظباط ….في اب بيعمل في بناته كده …ده كان يبقي اب خسيس و قذر و كل الاديان تحكم عليه بالاعدام …ايه الوساخه ديه …و الناس لسه عاوزه استقرار …طاب ابقوا اتنيلوا و استقروا ف ظل الديكتاتوريه العسكريه القادمه باذن الله

تيار التجديد الاشتراكي (صفحه علي فيس بوك) و جامعه عين شمس و ناس كتير قوي اتنبح صوتها عشان المجلس الاعلي يتفضل و يفرج عن الفنان التشكيلي والطالب عمرو عيسى و النهارده اتفضل المجلس و وافق انهم يعيدوا محاكمته…فيهم الخير و الله ألف شكر ده أنا هوطي و أحب علي ايده و الله يا ابه المجلس هو ده العشم برده

نواره ننجم كتر خيرها شكرت جيشها حبيبها عالخبر الحلو ده ست نواره ليكي عندي خبر  : لسه فيه ظلم تاني …لسه في خوف تاني …عاوزه أطلب منك طلب و النبي يا ختي سايقه عليكي النبي  بطلي تلييف ف الجيش

أنا بقي مش عاجبني التشكرات للمجلس الأعلي هو باي حق يقبض ع الناس و بأي حق يقدم مدنيين لمحاكم عسكريه حتي لو كانوا فعلا بلطجيه هم مدنيين و من واجب المجتمع انه يقدمهم لمحاكم مدنيه و من حقهم كمواطنيين انهم يبقي معاهم دفاع و شهود مش يتحاكموا محاكم عسكريه من غير اي حضور للدفاع أو الشهود …حقها تتسمي محاكم هزليه مش محاكم عسكري , الناس اللي قاعده تتشكر للمجلس كل ما يتفضل و يمن و يبص علينا بصه كده و النبي يا جدعان انتوا هتودونا ف داهيه بشغل العبيد بتاعوا ده لو عندكوا حاجه عدله ابقو قولوها و لو ما عنكوش اتنيلوا اخرصوا و أهو بناقص

هسيبكوا دلوقت و راجعه مره تانيه  بالباقي  لأن  لسه فيه ناس كتير محبوسه علي حس البلطجيه بتوع التحرير هتكلم عنهم تاني و عاشر

شهاده رشا عزب

مدونه رشا عزب لأنها ما قدرتش تقول الشتايم ف الفبديو

شهاده علي صبحي و خصوصا خدوا بالكوا من حته المحاكم العسكريه

شهاده سلوي الحسيني جوده

العفو الدولية:الجيش المصري عذب نساء محتجات

هيومان رايتس ووتش» تطالب بوقف التعذيب ومحاكمة المدنيين عسكرياً في مصر

نُشِرت في Uncategorized | تعليق واحد

ما بعد الاستفتاء…نقول كمااااان

ودونا البحر و رجعنا ماشيين علي رجلينا و واكليين علي قفانا لأنهم قالونا التصويت بنعم يعني الاستقرار …طاب بمناسبه الاستقرار ليه الحرايق رجعت بعد الاستفتاء و ليه ماحدش اتقبض عليه من اللي عملوا الماس الكهربائي في وزاره الداخليه و لا يعني هم ما يقدروش غير ع العيال اللي كانت عامله اضراب في الجامعه و ماييستجروش يمدوا ايدهم علي الشرطه و ليه بعد ما الاستقرار كان المفروض يرجع بعد التصويت بنعم و كأنها كلمه سحريه عاوزيين يعملوا قانون تجريم الاحتجاجات معني كده انه برغم من النتيجه الاجابيه العارمه لعمليه الاستفتاء القبله التعديليه ما قدرتش تنقذ المريض و انه مات فعلا…الجيش زي الجراح اللي راح قال لأهل المريض العمليه نجحت الحمدلله بس المريض مات…ألف رحمه و نور …طاب ماندفنه بقي و نخلص  م الليله ديه و لا يكونش الجيش عنده ترتيبات تانيه…ماحدش واخد باله منها  …يا تري ايه

من الواضح ان الجيش ضرب عصفورين بحجرو نفذ الخطه الحمضانه بتاعت مبارك يعني ايه بقي الكلام ده يعني ان الجيش ضرب التيارات السياسيه ببعضها زي ما مبارك و نظامه العفن كان بيعمل بالظبط قوم الاسلاميين ضد التيارات الليبراليه و الاشتراكيه و اليساريه وكل دول لأنهم كانوا عارفيين كويس قوي ان الاسلاميين و خصوصا الاخوان هيجروا بالمشوار ورا اي فرصه تقربهم من كراسي مجلس الشعب و في الحاله ديه هيقبلوا التعديلات و هيعملوا كل اللي يقدروا عليه وزياده شويه عشان التعديلات تتقبل و الغايه تبرر الوسيله طبعا و هينزلوا يقولوا للعالم أي كلام في البتناجان علي الماده التانيه و الاستقرارو عجله الانتاج و كل السيناريوهات الفاشله ديه لكن الناس بتصدق و ناس كتيره صدقت فعلا و الكل عارف ان الاخوان منظميين و عندهم قاعده شعبيه جامده و لزوم الشئ حطوا ايدهم في ايد السلفيين و الموضوع اتظبط و كله مشي تمام و كسبوا في غزوه الصندوق الشهيره طبعا من غير ما أي واحد فيهم يتعور تعويره صغيره و بكده يبقوا كسبوا المعركه من غير أي خسائر بس طبعا ده وهم كبير و زي ما مبارك كان بيديهم علي قفاهم حبيب الشعب هيديهم علي قفاهم بردوا… ليه بقي… هقول هقول كمان شويه

أما عن اخواننا بتوع التيارات التانيه باختصار اللي بيتقال عليهم المثقفيين كانوا عامليين شغل نار بقي حاجه كده تشرح القلب (الحق يتقال يعني …الواحد لازم يقول اللي له و اللي عليه ) و عملوا شغل ناس متقدميين بصحيح و نظموا مؤتمرات ناجحه جدا وكان فيها بال 500 و بال 1000 شخص حاضر و كلام جامد قوي بيتقال  و الناس تصقف …كلام  يعني لما تسمعه تصدق بصحيح ان الناس ديه مصدقه نفسها و قاعديين بقي يشرحوا و تحس انك ه ه ه هتفهم اهي جايه أهيه و الله أنا حاسه اني هفهم بعون الله  …و  ناس مصدقه انها فاهمه و كلهم علي بعض فاهميين بس مش عارفيين ينزلوا الشارع يفهموا الناس اللي هم فاهميينه و بيقولوا بقي كلام خطير و اشي يقول مجلس رئاسي و اشي يقول ما أدرك ايه جمعيه تأسيسيه دستوريه منتخبه و لاحدش فاهم مين هينتخب مين و لا مين هيرشح مين و عامليين نفسهم مش فاهميين …و لا يمكن هم كانوا مش فاهميين بصحيح ان الجيش لما كل واحد يمشي علي قفاه عمره ما هيوافق علي المجلس الرئاسي و بدل ما يقعدوا يرغوا مع بعض منهم لنفسهم نيسيوا ينزلوا الشارع يفهموا الناس ايه حكايه المجلس الرئاسي ديه و يقنعوا الناس ان ده مش طرد للجيش و لا حاجه و مش نكر لجميل حبيب الشعب و انما… قصر الكلام ما عرفوش يلموا الناس حوليهم

الخلاصه ايه بقي

الخلاصه ان الجيش حويط المكار ده …  الخلبوص… بيين علي الملء ان التيارات الديينه هتجري علي أي عضمه تترميهالها علي السكه و بالرغم من كده هتقدر تحشد ناس كتير و ناس كتيير هتمشي وارهم لأنهم بيعرفوا يقولوا الكلمتيين اياهم و الناس بتبصم علي طول وبكده أحيوا بوعبع التيار الديني …ابو رجل مسلوخه اللي عمر سليمان كان بيهدد بيه الناس  لما  مبارك كان قاعد مزنوق في القصر الجمهوري و مش عارفيين يعمولوا ايه في البلوي اللي هم فيها …قالوا ايه …ما انتوا فاكريين طبعا …بس سهي عليكوا …قالوا يا احنا يا الفوضي يا أحنا يا التيار الديني …يا سلام شوفوا التاريخ بيعيد بعضه ازاي و كل مره ناكل الطوعم احنا …شعب علي نياته يا ولداه

علي الصعيد الاخر…الجيش بيين للتيارات الاخري انهم ما عندهمش أي قاعده شعبيه و لا أي قدره علي الحشد و انهم قاعديين يرغوا و لا هم فاهميين اللي بيحصل حواليهم …و لا حول لهم و لا قوه …يا حلاوه

نهايته …بعد مافشلت خطه الفتنه الطائفيه …نجحت نجاح عارم خطه الفتنه السياسيه

و الجيش خلي اللي مايشتري يتفرج علي حال السياسه في البلد و علي حال السياسيين و اظهر للناس ان الكل كليله موحدث ديمقراطيه  …و طبعا هو (يعني الجيش) العاقل الراكز اللي محافظ علي الثوره …و مصالح البلد فوق أي اعتبار و فوق التيارات السياسيه الفاشله ذات نفسها …

مين اللي كسب في الاستفتاء بقي…حبيب الشعب …طبعا …الف مبروك وربنا يبارك له كمان و كمان و يرزقه بالذريه الصالحه قارد يا كريم ..و تتربوا في عزه …قولوا أمين

أبشروا الديكتاتوريه العسكريه قادمه لا محاله …يا اما نصحصح كده و نفوق من شغل الهبل بتاع الاسلاميين هيمسكوا البلد و الحوارات الفاشله بتاعت ان مصر هي أمي و الجيش هو أبونا …

يا أما هتستاهلوا الضرب بالعصي الكهربائيه …دورها جاي ديه

نُشِرت في Uncategorized | الوسوم: | أضف تعليق